Aína decide por unanimidá nun se presentar el 23-X

La formación asturianista, que ta viviendo un aumentu d'afiliación nos díes últimos, sigue enfotada nel trabayu con vista al 2027 y prepara un actu pal 8 setiembre p'abrir el cursu políticu.

L'Asamblea Nacional Estraordinaria d'Aína celebrada ayeri nel uvieín Centru Social Naranco decidió, por unanimidá, nun se presentar a les estatales del 23 de xunetu. Los militantes participantes, dalgunos de manera telemática, valoraron una ponencia de la Executiva y la Mesa Nacional na que se proponía'l 'Non' argumentando delles cuestiones, como pue ser por motivos de responsabilidá, al nun tener un programa estatal trabayáu, o'l contestu complexu actual.

Les intervenciones dieron muncha importancia a la necesidá d'asturianizar la política, asina como de crear un discursu y una visión propies que lleguen al conxuntu de la sociedá. Siguir trabayandones sos propuestes p’Asturies y la posibilidád’influyir nes instituciones dende l’esterior foron dalgunos de los argumentos que tamién se pudieron sentir.

Más allá d'esta votación, l'Asamblea Nacional enfocóse como un puntu d'intercambiu d'idees sobre'l país nun momentu importante como'l que tamos viviendo, cola constitución de los ayuntamientos y a la espera de la conformación del Gobiernu. Aína, que precisamente ta viviendo estos díes un aumentu de l'afiliación, aprobó tamién siguir fortaleciendo la organización, apostando por contruyir una propuesta política baxo’l títulu #ASTURIES2027, que garra como base los 30 puntos del primer programa políticu, y trabaya nun análisis fondu de los resultaos nos conceyos.

Amás acordóse facer un llamáu a la sociedá asturiana a participar en política más allá de les convocatories eleutorales, implicándose y garrando la pallabra, y prepárase un actu pal 8 de setiembre que sirva p'abrir el cursu políticu. "Aína quier siguir xenerando ilusión y llevar a tolos puntos d’Asturies el so programa políticu. Vienen cuatro años de trabayu ensin tiempu pal descansu", apunten dende la formación.