Aína asoleya un informe sobre Les Escuelines nel qu’alvierte de la falta de centros nel suroccidente

La Estaya de Xusticia Social y Servicios Públicos d’Aína ta acabante d'asoleyar el 'Primer informe d’escueles de 0 a 3 años’.

El documentu ye un análisis dende’l puntu de vista de la ufierta de places en tol país, poniendo'l focu nel abandonu del suroccidente, y de la necesaria calidá del serviciu, con propuestes pa una rede que “tien que ser asturiana”. El primer puntu, entituláu 'Abandonu del suroccidente', esplica que "la única novedá col anterior estudiu ye’l plan de crear una escuelina nel conceyu de Degaña", con conceyos como Allande o Ibias que siguen ensin ella.

Navelgas o Cibuyu, poblaciones de conceyos grandes como Tinéu o Cangas del Narcea, tampoco cuenten nel proyeutu de Les Escuelines con esti tipu de centros, polo qu'Aína considera "imprescindible l’apertura de nueves aules" nesti tipu de llugares. "La ufierta d’esti serviciu ye clave pal caltenimientu y afitamientu de families, especialmente nestos conceyos qu’amuesen una tendencia demográfica a la baxa de mou significativu", asegura.

Otra conclusión del estudiu per árees xeográfiques de la rede de 0 a 3 ye’l serviciu insuficiente nos conceyos más poblaos del centru y una acumulación nos núcleos más poblaos de caún. Aína propón una descentralización pa llegar a poblaciones importantes que nun tienen el serviciu, como podría ser Felechosa, As Figueiras, Llastres, Curniana, Nueva o Villoria, ente otres.

Calidá educativa

La formación asturianista valora posivamente’l pasu dau, pero fai delles observaciones n’otros aspeutos, como que “la calidá educativa va muncho más allá que l’apertura de escuelines”. Defende que la estaya de 0-3 años “ye una etapa d’aprendizaxes d’habilidaes básiques pa la vida como la comunicación, l’alimentación, el desplazamientu, el control d’esfínteres… Amás ye una fase onde los y les escolines son totalmente dependientes de la persona adulta y vulnerables”.

Tamién que tien “calter propiu”, polo que defenden “la disminución de les ratios pa falar de calidá educativa”. Nesti sen, planteguen averase “lo más posible a les recomendaciones europees: 4 escolinos y escolines por educador y educadora na etapa 0-1; 6 na etapa 1-2 y 8 na de 2-3”.

Demanda d’igual forma “dotar de recursos personales a les escuelines cola figura de la persona de sofitu en cada aula” y faceles inclusives con “personal especializáu qu’atienda les necesidades individuales del alumnáu con diversidá funcional”. Xunto a too esto, el partíu soberanista defende “ampliar los permisos de maternidá y paternidá p’abarcar el primer añu de vida” y qu’éstos garanticen “el cuidáu de la infancia cuando hai una enfermedá”.

Amás pide que “les escueles infantiles sigan el calendariu escolar afitáu pal restu d’etapes educatives, porque la reciella necesita descansar y el personal de les escuelines tamién”, a la par que reclamen “ufierta de campamentos y actividaes municipales pa los periodos non llectivos qu’ayuden a les families nesos momentos”.

Llingua materna

Aína tien bien claro que “esta rede tien que ser asturiana, por ello tien qu’haber materiales pedagóxicos rellacionaos cola cultura’l país”. D’igual forma rescampla que “l’asturianu y eonaviegu son les llingües maternes de muchos neños y neñes, polo que ye necesario educadores con formación llingüística qu’aseguren l’usu de la llingua materna autóctona nel entornu escolar yá dende les primeres etapes educatives, amás del enseñu del so vocabulariu básicu”.

Na imaxe, alumnos na escuela infantil de Candamu. Semeya recortada a partir d'una orixinal d'Armando Álvarez.