Agroganadería amplía’l periodu de pesca con muerte del salmón y los cupos por pescador

La Conseyería d’Agroganadería y Recursos Autóctonos fixo públicu’l borrador de la normativa de pesca del 2012, que tien el refugu de los ecoloxistes. La propuesta amplía’l periodu de pesca con muerte del salmón y los cupos por pescador.
 
Esta normativa, que la conseyería va presentar mañana nel Conseyu de los Ecosistemes Acuáticos y de la Pesca pal so debate, tien como oxetivu'l reequilibriu de la distribución de zones vedaes, zones llibres y zones acutaes nos ríos salmoneros y trucheros asturianos. N’opinión del Gobiernu de Francisco Álvarez-Cascos, aficionáu reconocíu a la pesca, esta propuesta respuende "al cambiu d'actitú de determinaos sectores sociales no relativo a la normativa añal de pesca fluvial, que se percibe tanto a nivel popular como al traviés de les propuestes o suxerencies previes recibíes de les distintes asociaciones collaboradores y otros coleutivos". Asina, interpreta que "les preocupaciones manifestaes pol sector apunten hacia una demanda de cambios sustanciales que permiten la recuperación de les costumes históriques na sociedá riberana, y el restablecimiento d'equilibrios en dellos aspectos fundamentales, contribuyendo coles mesmes a un meyor y mayor caltenimientu de los ecosistemes acuáticos y de la pesca n'agües continentales".
 
Ente les propuestes más destacaes daes a conocer por Agroganadería destaca la eliminación de la pesca ensin muerte, polo que va ser posible pescar salmones a lo llargo de tola temporada: del 18 de marzu al 31 de xunetu, ensin negún día de veda. Esto supón, según informa la Coordinadora Ecoloxista d’Asturies, pasar de 55 díes permitíos nel 2011 a 136 l’añu qu’entra. D’igual forma, tamién s’amplíen los cupos de pesca y cada aficionado va poder echar a tierra un salmón por día na zona llibre y trés nos cotos, cuando l’añu pasáu el máximu yera de trés exemplares en tola temporada. Esta normativa que quier impulsar FAC supón un xiru de 180 graos con respeutu a la implantada pol PSOE y IX-LV nes dos temporares últimes col oxetivu de protexer la especie y aumentar la población salmonera nos ríos asturianos.
                                     
Crítiques de los ecoloxistes
 
Tres conocese’l borrador que la conseyería va presentar mañana nel Conseyu de los Ecosistemes Acuátucos y de la Pesca, nun tardaron en salir les primeres voces crítiques contra la propuesta gubernamental. Asina, la Coordinadora Ecoloxista d’Asturies, que forma parte d’esi conseyu, denunció que “namái conocemos el conteníu de les propuestes del Principáu al traviés de los medios de comunicación” y que, a falta d’un día pal aconceyamientu, “tovía nun tenemos nin orde del día nin proyeutu oficial”.
 
Pa los ecoloxistes, esta normativa ye “mui preocupante y alloñada de la realidá biolóxica de los ríos asturianos”. “Entendemos que les cifras de salmones pescaos de les campañes últimes son lo bastante alarmantes como pa tomar midíes conservacionistes, pero lo que nun entendemos son les propuestes feches pol Principáu que ponen en peligru a los peces de los ríos. Foro namái ufre midíes a plazu curtiu pa satisfacer a los pescadores depredadores, ensin pensar na conservación y el futuru d’Asturies, y nos pescadores conservacionistes, que tamién hai”, resalten dende la Coordinadora.