Agricultura va financiar la promoción de la sidra asturiano

Asturies aspira a convertise nún "referente mundial de la sidra" y pa ello va celebrar nel primer semestre del 2007 el "Primer Salón de la Sidra de Calidá" que va axuntar a representantes de países ellaboradores de tol mundu, según esplicó'l presidente asturianu Vicente Álvarez Areces dempués de firmar cola ministra d'Agricultura, Pesca y Alimentación Elena Espinosa, un conveniu de collaboración pa la promoción de los productos agroalimentarios asturianos nel que s'inxerta esti congresu.

Per aciu d'esti conveniu, el Ministeriu va aportar hasta 600.00 euros, mientres que la Conseyería d'Agricultura asturiana va aportar otros 257.000, y va tener validez hasta'l 31 d'avientu d'esti añu. El congresu va ser la so acción más destacada, y va traer a especialistes nel mundu de la sidra d'Euskadi, Bretaña, Normandía, Inglaterra, Gales, Escocia, California, Canadá y Xapón, amás de los asturianos, anque entovía nun se sabe en que llugar va facese.

El presidente asturianu Alvarez Areces definió a la sidra como un "productu identitariu d'Asturies" y como un "factor de desarrollu económicu y social fundamental de les zones rurales", con una producción añal de más de 70 millones de llitros.

Pela so parte, la ministra Espinosa esplicó qu'Asturies atropa les condiciones precises pa "liderar" les denominaciones d'orixe y la producción agroalimentaria de calidá, espresando la voluntá del so ministeriu pa collaborar col Gobiernu asturianu nel desarrollu d'iniciatives com la que s'aprobó ayeri.