Agora Repúbliques lleva'l casu de discriminación llingüística na Xunta a la Comisión Europea

|
Agora Repúbliques lleva'l casu de discriminación llingüística na Xunta a la Comisión Europea

Pide que se posicione énte la privación a la conseyera Berta Piñán "del drechu a utilizar l’asturianu nel Parllamentu d’Asturies".

Andecha Astur, al traviés de la coalición Agora Repúbliques, na que participa, ta acabante de presentar un escritu a la Comisión Europea, "organismu del que mos costa el respetu a les llingües y cultures, asina comu el so envís proteutor pa con aquelles que, comu ye’l casu de l’asturiana, s’alcuentren minorizaes pola presión d’otres". La formación nacionalista considera "discriminatoria" l'argumentación dada pola lletrada de la Xunta Xeneral presente na Comisión de Cultural, Política Llingüística y Turismu, "siendo amás contraria a lo afitao na Carta de los Drechos Fundamentales de la XE (artículu 21) onde se recueye que 'prohíbese toda discriminación, y en particular la exercía por razón de llingua' y a la resolución del Parllamentu Européu sobro les llingües europees menaciaes d’esapaición y la diversidá llingüística".

"Nes entrugues pidióse a la Comisión que se posicione ante la privación del drechu a utilizar l’asturianu nel Parllamentu d’Asturies carecíu por una miembru del Gobiernu asturianu, asina comu énte la discriminación costante de la ciudadanía sobro l’usu de la llingua", espliquen dende Andecha Astur, que tamién pregunta por "qué midíes cuenten poner en marcha dende la Comisión pa protexer los drechos llingüísticos de la ciudadanía de la Xunión y facer cumplir la Carta de los Drechos Fundamentales de la XE". L'organismu comunitariu tien un plazu máximu de tres meses pa retrucar al escritu.

Semeya de la Cancillería del Ecuador baxo llicencia CC BY-SA 2.0.

Contador Estadistiques