¡Agora a pola Supercopa!

|
¡Agora a pola Supercopa!

Xixón vuelve allugar esti sábadu 1 un eventu importante pal balonmanu asturianu como ye la celebración de la Supercopa d'España ente'l B.M.C. Liberbank Xixón y Super Amara Bera Bera.

Amás del alcuentru de la Supercopa, Xixón tamién va ser sede de la Gala del Balonmanu Femenín, na que se va reconocer a les meyores xugadores de la entá recién 'Liga Guerreras Iberdrola 2017/2018'. Pal equipu xixonés esta perimportante cita va suponer un merecíu homenaxe a Miguel Álvarez Baños, presidente del club fináu apocayá.

Nel planu deportivu, Liberbank Xixón, la gran sorpresa del pasáu cursu al conquistar la Copa de S. M. La Reina en Málaga, anicia la campaña énte'l so públicu y con grandes retos per delantre. La so plantiya sufrió un cambéu dafechu, cola marcha de trés xugadores clave: Agustina López y Rocío Campigli, dambes con destín a Málaga, y Renata Lais, la portera brasileña, una de les claves del ésitu del pasáu añu, que precisamente engrosa les files del primer rival del conxuntu asturianu, el donostiarra Súper Amara Bera Bera.

El conxuntu de Diego Lafuente incorporó dos xugadores prometedores del mercáu arxentín, Camila Bonazzola y Giuliana Gavilán, dambes de 22 años y titulares cola camiseta de la selección albiceleste. Xunto a elles destaca'l fichaxe de Raquel Álvarez, una portera veterana y esperimentada na lliga española y francesa, y el de Tatiana Lozano, formada na cantera del CLEBA y con munchos partíos a los sos llombos na máxima categoría del balonmanu femenín español.

Súper Amara Bera Bera, pela so parte, escoyo acurtiar la so plantiya en busca de recuperar el dominiu absolutu y suañar cola conquista de tolos títulos n'España.

Imanol Álvarez recueye'l testigu de Montse Puche nel banquín vascu y dispon de fichaxes importantes, como Renata Lais, que, a pesar de la so curtia edá, demostró en Xixón tar llista pa competir al máximu nivel. Judith Sans ye otru de los nomes clave d'esti branu al rematar la so curtia aventura en Dinamarca y tornar al senu de la entidá donostiarra. Xunto a ella, incorpórense dos pivotes poderoses nel apartáu físicu como son Nekane Terés y Yunisleidy Camejo, ansina como dos xugadores d'orixe brasileñu que van alzar tamién el nivel de la plantiya: Priscila do Santos y Fernanda da Silva.

Súper Amara Bera Bera busca la conquista del títulu de la Supercopa d'España de Balonmano Femenín per séptima vegada na so hestoria, a diferencia del Liberbank Xixón qu'encara'l so debú.

El partíu de la Supercopa va se el sábadu 1 a les 18:30h. nel Palaciu de Deportes de La Guía en Xixón. Les entraes tienen un preciu de 10€ na taquilla'l día del partíu y de 7€ de venta anticipada nos locales de la Federación de Balomnanu del Principáu d'Asturies y na tienda 'Universo Balonmano'.

Contador Estadistiques