Afayos arqueolóxicos y costumes asturianes nel númberu 18 de Belenos

La selmana qu'entra va tar nes llibreríes del país el númberu 18 de la prestixosa revista "Asturies, memoria encesa d'un país" qu'edita'l Conceyu Etnográficu Belenos. Asturies.com faló con Astur Paredes, del conseyu editor d'esta publicación, que nos presentó los conteníos del númberu.

El númberu 18 de la revista qu'edita Belenos llega la selmana qu'entra a les llibreríes del país con una riestra d'artículos de los temes más estremaos dientro de la investigación sobre la cultura y la historia asturianes. Ente los artículos que rescamplen nesta decimooctava entrega de la revista, alcuéntrase la collaboración d'Ignacio Abella, que baxo'l títulu "L'abeduriu, árbol de blanco" fai un repás al papel d'esta especie na cultura tradicional asturiana material y inmaterial. Esti artículu supón el terceru d'esti autor pa la revista, afondando nel estudiu de lo árboles más emblemáticos d'asturies dempués de dedicá-yos otros dos artículos al fresnu y al texu.

L'afayu, podría dicise que casual, por parte de Xuaco Palacios y David Álvarez, de restos cerámicos nuna playa de Perlora llevó a descubrir nel sablón d'Entrellusa un enterramientu en cueva nel que s'atoparon dos cuerpos y delles pieces ente les que rescampla un puñal tipu "simancas". Esti ye'l tema sobre'l que trata l'artículu "La playa d'Entrellusa, del paleolíticu a los enterramientos tardorromanos nel medievu" que firmen Gemma Adán y otros 18 especialistes qu'ayudaron a datar y catalogar esti afayu arqueolóxicu nun llabor que precisó de la collaboración del equipu d'Atapuerca.


Nicolás Bartolomé Pérez ye l'autor del artículu "Cuando llueve y fai sol, anda la vieya alredor" nel que se mete pel estudiu del mitu paneuropéu de "la vieya" alcontrando que se trata d'una personificación del clima en munches cultures y mui vivu n'Asturies, como demostraríen la esistencia d'abondos refranes y dichos y tamién la esistencia de figures folclóriques como les máscares d'iviernu.

"La cuerna d'Armentíu y l'usu tradicional de la cuerna" ye un estudiu sobre l'usu de les cuernes de ganáu que tamién s'enxerta nesti númberu de "Asturies memoria encesa" Fechu a partir de la colección de cuernes de Leopoldo Palacio y cola collaboración de Berto Peña y Gausón Fernande, l'artículu espeya los usos de les cuernes na cultura pastoril asturiana, descubriendo tamién los sos programes decorativos.

Joaquín Fernández García firma la collaboración"del.las costumes asturianas de primavera y branu" que fai estoyu de vezos tan populares como l'enramao, les rellacionaes cola nueche de San Xuan o l'árbol de misa cantanu.


Un artículu del arquitectu Rogelio Ruiz sobre los palombares de Mieres, l'aportación de Daniel Cueli resumiendo'l casu del faisán montés de Braña Mumián y un escritu del economista José Alba sobre les repercusiones del "Protocolu de Kyoto" completen esti númberu de Belenos que tamién enxerta'l so tradicional separtáu de semeyes "Memoria gráfica" dedicada nesti númberu a Candás y fecha pol grupu de baille "San Félix". Finalmente, los "Cartafueyos de Belenos" presenten a Francisco Jordá Cerdá, qu'espón l'intentu fallíu de facer n'Asturies un Institutu de Patrimoniu Cultural que funcionare como axencia de coordinación d'actuaciones conxuntes sobre'l patrimoniu.
Más información na web de la Fundación Belenos