Adolfo Camilo Díaz regresa a l’actividá lliteraria con ‘L’arume’

Tres espublizar ‘Espankin’ nel añu 2012, y llevar pentemedies, nel 2016, el Premiu María Xosefa Canellada de lliteratura infantil y xuvenil con ‘La mar’, Adolfo Camilo Díaz torna a asoleyar una obra p’adultos, ‘L’arume’. Va presentala esti martes en Mieres.

‘L’arume’ (Ediciones Trabe) ye una novela curtia, de primeres pensada pa teatru, que se desendolca nun motel de carretera de nome ‘Machu Picchu’, con una trama d’amor y suspense. “Escrita con trazu rápidu, con un daqué de cinematográfico, ‘L’arume’ fala de la vida, de la muerte y de la única esperanza que-y queda al ser humanu: suañar con Machu Picchu y la so piedrona sagrada, símbolu de la esperanza de la vida y la humanidá”, apunten dende la editorial.

Espublizada a últimos del 2017 y presentada recién n’Avilés, l’autor va facer lo propio esta tarde en Mieres. Va ser a les 18.30 hores na Librería La Pilarica nun actu que va tar presentáu por Rafael Balbuena.