‘Ad-vientu’ lleva’l premiu del públicu na ‘Sección Asturias’ del XVI Avilés Acción Film Festival

El curtiu en llingua asturiana ‘Ad-vientu’, de Roberto F. Canuto y Xiaoxi Xu, sigue sumando gallardones. Al premiu del públicu del Día d'Asturies nel FICXixón y al Meyor Curtimetraxe nel Falcon International Film Festival de Londres, suma agora’l del públicu de la ‘Sección Asturias’ del XVI Avilés Acción Film Festival.

El fallu de les votaciones de públicu y xuráu diose a conocer el sábadu na gala de clausura del certame avilesín de curtiumetraxes, celebráu nel Teatru Palacio Valdés. La cinta asturchina foi la favorita de los espectadores de la ‘Seccion Asturias’, na que competía con otres cinco producciones, sumando asina’l so tercer gallardón tres l’algamáu en payares en Xixón y en mayu en Londres.

El ganador del premiu del xuráu foi pa ‘Tiempos muertos’, de David P. Sañudo, mentes que na seición oficial resutó vencedor ‘El vestido’, de Javier Marco, siendo’l favoritu del públicu ‘Un minutito’, de Javier Macipe. El premiu de Meyor Actor llevólu Nico Roig (‘L’home llop’), Pilar Pereira’l de Meyor Actriz (‘As vacas de Wisconsin’), Sara Traba’l de Meyor Guión (‘As vacas de Wisconsin’) y Lucas Castán el de Meyor Direición (‘Los hombres de verdad no lloran’).

Saltu a América

‘Ad-vientu’ trátase de un drama psicolóxicu con tintes de misteriu que narra la historia de Suso (David Soto), un mozu ensin trabayu y ensin futuru, que tres falar y siguir a una moza que-y recuerda a la so madre finada, ésta acaba tirándose per un cantil ensin poder él evitalo. El protagonista buscará entós respuestes que-y despertarán recuerdos del pasáu y fadrán que se replantegue la so propia identidá.

La producción astur-china rodóse n’Avilés y Carreño en llingua l’asturianu, estrenándose nel Festiva Internacional de Cine de Gijón (FICXixón). Esti branu va facer la so premier americana al tar nominada nel Regina Festival International Film Festival and Awards, que se celebra nesta población canadiense del 16 al 19 d’agostu.

Na semeya, los premiaos del XVI Avilés Acción Film Festival. Imaxe obra de Maximino González Martín.