Acusen al Seprona de “acosar” a los ganaderos

El Sindicatu agrariu COAG-Asturies pidió ayeri una reunión formal col Delegáu del Gobiernu Antonio Trevín pa falar de la riestra de denuncies que ta poniéndo-yos el Serviciu de Protección de la Naturaleza de la Guardia Civil (Seprona) a ganaderos y agricultores del occidente asturianu por emplegar el tractor cargáu con gasoleo agrícola, pa usos que, según el Seprona, nun son "agrarios".

El gasóleo agrícola ye combustible diesel que tien menor carga fiscal que lo que gasten coches y camiones, y namás s'estrema de lo normal en que lleva un colorante distintu pa identificalo en posibles controles. En teoría, esti gasoleo namás pue emplegase pa usos agrícoles. Ello ye que'l Seprona lleva tiempu poniendo denuncies, les más d'elles pa la parte del conceyu de Valdés, que parten d'una interpretación de lo que ye "actividá agrícola" que nun concueya col conceptu tradicional de la mesma. D'esta manera, usar el tractor pa llimpiar de rozu una faza, carretar pa casa la lleña que sobra d'una corta nuna ocalitrera o sacar piedres d'un prau pa facer una muria na cuadra son pal Seprona "actividaes industriales". La denuncia que se pon d'oficiu pue acarretar una multa d'hasta 12.000 euros y el precintao, por un tiempu d'ente un mes y un añu, del tractor. Casu de ser reincidente, estes sanciones dóblense y puen llegar hasta los 2 años de precintao del tractor y 24.000 euros de multa.

El sindicatu COAG, qu'entiende que toos estos llabores son tradicionales nel campu asturianu y nun pue esixise que s'ande contratando un camión pa facer estos llabores, tien archivaes toes estes denuncies, la última a un vecín de L.luarca qu'acarretaba cubiertes de coche vieyes que-y regalaren nun taller col tractor pa pesllar con elles un celleru de pación. Énte estes situacionesel sindicatu pide que se defina que ye lo que s'entiende por "actividá agrícola"

La situación vien de vieyo, y COAG yá intentare vese cola anterior delegada del Gobiernu, Mercedes Fernández, que nunca nun respondiere a les llamaes del sindicatu que dirixe Marino Fernández, quien declaró que "Abrir espediente a un ganaderu por cargar lleña en tractor pa calecer la cocina ye, cuando menos, difícil de pasar".