Actos nel día de la muyer

El 8 de marzu, Día Internacional de la Muyer celébrase n'Asturies con estremaos actos, dellos institucionales, centraos los más importantes d'ellos en Llangréu, y otros alternativos organizaos por colectivos sociales y feministes y tamién por partíos políticos. Toos col oxetivu común de rescamplar les torgues que la sociedá moderno pon na integración de la muyer y el reconocimientu de los sos derechos.

Ente los primeros rescamplen los actos oficiales entamaos pol Institutu de la Muyer, que van desarrollase en Llangréu dende les 5 de la tarde cola presentación de la periodista Montserrat Martínez, de Radio Llangréu, y nos que van participar el Presidente Asturianu, l'Alcaldesa de Llangréu y cuatro muyeres que l'Institutu Asturianu de la Muyer entiende que son "significatives na construcción de la igualdá n'Asturies". Ente estes muyeres rescampla Concepción Rodríguez Valencia, descendiente d'una dinastía de mineros que vio como la empresa estatal HUNOSA-y negaba l'accesu a un puestu de trabayu al que tenía derechu nel añu 1985, entamando una llucha nos tribunales que remató nel añu 1992 con una sentencia del Constitucional que-yos reconoció a les muyeres el derechu a trabayar na mina. La poetisa Nené Losada Rico, Medaya de plata d'Asturies y decana de les lletres n'asturianu, la especialista en recursos humanos Carmen Valdés y la historiadora Mónica González Santana, especializada nel estudiu del papel de la muyer asturiana nes dómines prerromana y romana completen el grupu de muyeres representatives escoyíes pol IAM nun actu que va echar el piesllu coles actuaciones musicales del grupu de pop femeninu Nosoträsh y la cantante Tina Gutiérrez.


Ente los actos non institucionales, el partíu nacionalista Izquierda Asturiana, al traviés de les sos mocedaes, tien convocada tamién pa les 5 de la tarde una mesa redonda na Sala Polivalente del Campus del Milán, n'Uviéu, contando cola opinión de muyeres d'estremaos ámbitos qu'abarquen la enseñanza, la música, la homosexualidá o l'Islam, siendo les convidaes al debate Fatima Ahmed-Shalem, estudiante saharaui n'Asturies, Cristina Pardilla, militante de Tribadas, estaya de muyeres de Xente Gai Astur (XEGA), Paula Cristobal, estudiante de maxisteriu y componente del grupu folk "Dulcamara" la Doctora en Filoloxía y profesora d'institutu Pilar Fernández y Yolanda Huergo, abogada y militante d'Izquierda Asturiana. La mesa va finar abriéndose a un debate públicu y va echase'l piesllu cola actuación del grupu de muyeres "Dulcamara".

Los actos del día de la muyer van incluyir una concentración n'Uviéu entamada pola plataforma "8 de marzu" entamada por distintes asociaciones y grupos. Ello va ser a les 8 de la tarde enfrente del Teatru Campoamor de la capital asturiana.

Otramiente, dellos conceyos asturianos celebren estos díes plenos y faen actuaciones especiales dedicaes a la muyer. Ye'l casu del Conceyu de Xixón, qu'ayeri inauguró una cai col nome de la científica asturiana Margarita Salas y que tien abierta la esposición "Muyeres na ciencia", que pue visitase hasta'l 31 de marzu nel Centru Cultural Antiguu Institutu. L'Ayuntamientu de Villaviciosa, pela so parte, va celebrar esta tarde a les 5 un actu en que va dase a conocer un informe sobre la situación de la muyer nel mediu rural.