Actos de la Xunta Pola Defensa de la Llingua

La Xunta Pola Defensa de la L.lingua Asturiana n'Occidente entama esti sábadu 11 de marzu nel cine Marvi de Tinéu, a les 19.30 hores, un conciertu col envís de festeyar los trenta años de carrera del cantautor n'asturianu de Tinéu Rafael Lorenzo. Pa esti conciertu especial, amás del so grupu de músicos, Rafel Lorenzo va tar acompañáu pola voz de Xosé Fernández "Ambás", los músicos de La Bandina'l Tombo, el cantautor de Cangas del Narcea Pedru Pereira, el grupu de pandereteres de Nerbia o la banda de gaites El Rapigueiro de La Puela, ente otros. N'acabando l'actu, va facese un filandón na plaza Las Campas de Tinéu, onde, según s'anuncia dende la Xunta Pola Defensa de la L.lingua Asturiana n'Occidente, amás de siguir la folixa, va poder disfrutase de la meyor gastronomía del conceyu y vinu del país.

El día enantes, vienres 10, la Xunta Pola Defensa de la Llingua Asturiana va presentar públicamente la so agrupación de Siero, conceyu onde la organización cívica de defensa del idioma va tener abonda presencia d'agora en p'alantre. Ello va ser nun actu que va tener llugar na Casa de Cultura de la Pola a les 8 de la tarde y que va animar la Banda de gaites Conceyu Siero, contándose pa la ocasión con una charra de presentación a cargu del filólogu Fernando Balbuena y l'actuación del grupu "Xentiquina". Darréu d'ello va celebrase una espicha de presentación nun local del centru de la Pola.