Actividaes alredor de la música tradicional asturiana

Juan Alfonso Fernández García, Director del Muséu de la Gaita de Xixón, va ser l'encargáu de poner esti domingu 14 de xineru la charra "La canción asturiana y los instrumentos acompañantes" una actividá na que van collaborar la musicóloga
Marisa Luque, que va apurrir la so voz, toques de pandereta, pandeiru, payel.la y castañueles, el gaiteru
Armando Fernández y el cantante
Tino Braña. L'acontecimientu va tener llugar a les 12 hores nel Salón d'Actos del Antiguu Institutu Xovellanos, asitiáu na Cai Xovellanos, nº 21.

D'otra manera, y na capital asturiana, va tar abierta dende esti llunes 15 la esposición “Pal son. Instrumentos d’una tradición”. Organizada pola Conseyería de Cultura esta esposición d’intrumentos de la tradición musical asturiana faise cola intención “d’averar a los visitantes a aquellos instrumentos que fueron y son importantes para una tradición musical: l’asturiana”.

L'amuesa va tar abierta na Biblioteca d’Asturies “Ramón Pérez de Ayala” d’Uviéu hasta'l 28 de febreru, y nella van poder vese dellos instrumentos xunta a una breve descripción d’estos y la so función na historia de la musica asturiana.