Accidente na Selmana Negra

Un trabayador d'un puestu de la Selmana
Negra morrió nun accidente qu'abre duldes sobre la seguranza del certame



Según dellos testigos, la víctima, que trabayaba nun puestu
de churros de la Selmana Negra, sufrió una descarga de corriente a les
seyes de la mañana del martes cuando entró pingando al puestu porque venía de
dar una ducha con una manguera qu'había tres del puestu y tocó
con un aparatu, al paecer una freidora, que taba a masa. La instalación
eléctrica según información de los testigos, taba
puenteada pa recibir más corriente, colo que'l diferencial nun saltó, lo qu'agravó'l
trallazu. La instalación tampoco nun tenía toma a tierra.



El retén de seguranza de la Selmana Negra que foi a atender a la víctima,
yá de mano tuvo dificil el desconectar la corriente, porque la caxa nun
taba precisamente en sitiu amañosu. Pa más aquello, la Selmana
Negra nun tien ambulancia propia namás que hasta les 4 de la
mañana, polo qu'hubo de llamar a una de fuera, y precisose d'esperar
más de media hora hasta qu'aprució una UVI movil que, pa cuando
vieno, yá nun pudo facer por salvar al accidentáu, que
morrió en suelu ensin tan siquiera recibir atención
n'ambulancia.



El puestu de churros onde pasó l'accidente ta trancáu por
orde de la policía, qu'agora tien pendiente investigar les
responsabilidaes d'esti socesu, que vien a descubrir los fallos na seguranza
d'una feria pela que pasen tolos díes miles de persones y na que
trabayen bien de persones que, durante los diez díes que dura,
convierten aquello en casa provisional.



Ello foi qu'al día dempués tolos puestos punxeren nes sos
instalaciones eléctriques les tomes de tierra que nun teníen,
pero ello, más qu'iguar les duldes que dexa la seguranza de la feria,
fai sospechar de qu'haya más entrampiaos y lleva a entrugase por otros
bien de puntos negros que s'atalanten namás con dar un paséu pela feria. Por poner un casu, les carpes de plástico qu'atechen los chigres y
puestos nun tienen estintores a la vista, incluso cuando se cocina dientro
d'ellos, o por falar de detalles más pequeños, les mangueres de
cable crucen dayures per onde pasa la xente ensin apantallamientos pa tapales.



La muerte del accidentáu, ye paradigmática de bien de realidaes que se dan nel recintu de la feria. Ciudadanu bolivianu de 32
años, la víctima formaba parte de la gran comunidá d'inmigrantes que trabayen na Selmana Negra, bien d'ellos nun vacíu llegal que los dexa ensin derechos nin identidá, y la so muerte dexa abierta una riestra de duldes sobre les responsabilidaes que
deriven del accidente. Por de pronto, los amos del puestu rellacionáu col accidente
dicen qu'aquello nun pasare dientro del
puestu y que la víctima nun trabayaba pa ellos.