Acaba'l llabor de la Comisión Internacional

Vecinos de La Camocha, xunta miembros de la Xunta pola Defensa de la Llingua Asturiana y representantes de les organizaciones polítiques IU, BIA, Andecha Astur y IAS participaron esta mañana nuna acción-protesta na parroquia de Vega-La Camocha col que quería facese un llamáu d’atención a los responsables de política que sigue’l Conceyu de Xixón pa cola llingua asturiana.

El llabor mal fechu pol Conceyu de Xixón en materia de toponimia recibió la simbólica igua de los presentes en forma de pegatines colos topónimos correchos.

Al actu simbólicu acudieron tamién los responsables de la Comisión Internacional pa la salvaguarda de los Derechos Llingüísticos n'Asturies, qu'estos díes ta recorriendo el país, como puede vese na semeya qu'acompaña a esta noticia, na que la antropóloga holandesa Alie Van der Schaaf posa xunta ún de los indicadores "iguaos" polos manifestantes. Los miembros del Comité, qu'ayeri aconceyó pela mañana colos sindicatos d'enseñanza y los grupos parllamentarios socialista y popular na Xunta Xeneral del Principáu, aconceyando de tarde col alcalde de L.luarca nel marcu d'una visita al conceyu. El llabor del comité termina güei cola entrevista que-yos solicitó, nel últimu momentu, el Conseyeru de Cultura Javier Vallina.

Nun comunicáu de prensa relativu a l'acción, la Xunta dixo que quería recordá-yos tanto al gobiernu municipal del conceyu como al autonómicu que la Llei del Asturianu, aprebada nel añu 1998 na Xunta Xeneral por unanimidá diz que “Los topónimos de la Comunidá Autónoma del Principáu d’Asturies han tener el nome oficial na so forma tradicional. Pal casu de qu’un topónimu tenga usu xeneralizáu na forma tradicional y en castellán, el nome podrá ser billingüe” un recordatoriu que la Xunta empobina especialmente al conceyal responsable de la caótica retulación na zona rural, Faustino Garcia “Tino Venturo”