Abrióse'l plazu pal "Cuartu los Valles"

Ya se puen unviar maquetes pal tercer concursu de folk "Cuartu
los Valles", que tolos años se celebra en Navelgas (Tinéu).
Ye, per enriba de too, una oportunidá pa que grupos nuevos amuesen el so
trabayu y podamos tener una idea de per onde van les nueves idees na escena
folk.

Esti concursu va afitándose añu tres añu, garrando
ca vegada más importancia dientro del circuitu estatal, la prueba ye les
maquetes que lleguen a los organizadores dende tol territoriu del estáu
español, Portugal, Suiza y incluso Marruecos. Esti añu esperen la
mesma o mayor rempuesta, y pa ello podéis unviar les maquetes a III
Concurso Folk
Cuartu los Valles, Casa de Cultura 33873 Navelgas (Asturies), enantes del
15 de xunu. La recompensa pa los ganadores ye enforma apetecible, pal primer
premiu sedrán 1.200 €, pal segundu 500 € y pal tercer, cuartu
y quintu puestu 300 €.

Los organizadores escoyeran 5 grupos ente les maquetes recibíes,
estos grupos actuarán el 27 de xunetu delantre d'un xuráu
compuestu por - Jose Antonio Labordeta (Cantautor), Homero Cardoso (Dtor.
Cantigas do Maio - Lisboa), Alfonso Delgado (Dtor. Fonofolk), Fernando Neira
(críticu musical - El Pais) y Xuacu Amieva (Músicu - Gaiteru).