Abre'l primer muséu asturianu de la vivienda obrero

Ayeri inaugurose na Ciudadela de Capua en Xixón el primer muséu dedicáu a la vivienda obrero n'Asturies, un aspectu desconocíu de la etnografía de la era contemporánea y de la nuestra historia social pero d'abonda repercusión na formación de la sociedá y la ciudá industrales n'Asturies dende la segunda metada del sieglu XIX.

El muséu recupera los restos de l'antigua ciudadela de Celestino Solar o "Ciudadela de Capua" conxuntu de viviendes obreres llevantaes pol indianu Celestino Solar na década de 1870 y que tuvieron ocupaes hasta 1987, en que trancaron definitivamente, quedando'l patiu en ruina hasta que la iniciativa del Ayuntamientu decidió facer de les cases un muséu n'abertal en qu'enseñar como yeren les condiciones de vida de más del 40% de la población de la ciudá a primeros del sieglu XX: menos de cuarenta metros cuadraos pa cada familia, materiales probetayos, ensin traida d'agua, con un serviciu pa más de venti viviendes y ensin más calor que'l del llar de la cocina, too ello pagando alquileres que dacuando raspiaben col tope de les posibilidaes económiques de los ocupantes.

La ciudadela de Capua ye namás una, quiciás la que más se conoz, de los más de 200 patios y ciudadeles que se tien censaos qu'hubo en Xixón. Si de mano foi la primer construcción qu'hubo nel solar qu'ocupa, colos años otres viviendes de pisos y pa xente con más posibles foron arrodiándola hasta tapala dafechu a la vista de quien pasare pela cai, faciendo d'ella un auténticu patiu insalubre y masificáu n'oposición al Xixón burgués que, a menos de 100 metros, disfrutaba de les cases de baños de Les Carolines, na Playa de San Llorienzo. La miseria que vieno tres la Guerra Civil y l'espoxigue de la ciudá caltuvieron el problema de la vivienda, allongando nel tiempu la vida de patios y ciudadeles n'Asturies mientres diben esborriándose de los mapes de les ciudaes d'Europa. Nel casu de Capua, l'antiguu patiu de viviendes sobrevivió hasta los nuestros díes la presión urbanística, anque yá ensin la fonción de vivienda.

Un equipu d'historiadores y arquitectos recuperaron la ciudadela, que d'agora en p'alantre la ciudadela va tar abierta a los visitantes ofreciéndo-yos una serie de conteníos estáticos y interactivos qu'ayuden a pescanciar la cuestión de la vivienda obrero, rescamplando ente ellos el vídeu con retayos d'imáxenes de distintes viviendes obreres n'Asturies.