Abondos proyectos discográficos esta primavera

La discográfica L'Aguañaz tien ente manes esta primavera varios proyectos, el nuevu discu de Dixebra, que yá ta grabándose, un directu de Toli Morilla, Skama la Rede o el hip hop de Dark-la-eMe.

El principal col que ta agora esta casa de discos ye la grabación de "Ensin novedá", que ye'l títulu que va tener el nuevu discu de Dixebra. El grupu yá ta nos estudios Tutu de Corvera trabayando nesti nuevu discu xunta'l so técnicu de soníu Sergio Rodríguez. Asturies.com yá puede adelantar que "Ensin Novedá" va salir pa últimos de mayu y que va presentase nun conciertu na playa de poniente de Xixón na foguera de de San Xuan. N'acabando de grabar Dixebra, entra nel mesmu estudiu'l dos de mayu Skama la rede. El grupu de Carreño va grabar ellí "La nuesa historia", el so primer discu depués de la so maqueta "Hestories absurdes".

Un conceptu diferente ye lo que quier desenvolver esta casa de discos col cantautor Toli Morilla. Ello ye que va grabase l'espectáculu completu "Nueche d'insomniu", una iniciativa de Toli Morilla onde xúnense música y poesía al traviés de los cantares de Toli y los poemes que reciten en directo dellos poetes asturianos. El discu va espublizase un formatu llibru-cd con tolos testos y poemes del espectáculu. Inda tán mirándose delles feches pa facer la grabación, pero si ye seguro que'l cantautor asturianu va tar acompañáu pola guitarra de Julio Gilsanz.

Amás d'estos trés discos, L'Aguañaz tamién rescatar esta primavera'l subsellu Goxe Records. La meyor manera que toparon pa facelo foi la de grabar un single a Dark-la-eMe, como adelantu del so discu de llarga duración. Nesti single vamos topar trés cantares d'esti músicu de la Pola L.lena, anque solo ún d'ellos auténticu va tar nel próximu discu, el yá mui conocíu na rede "Asturiano en Londres". Los otros dos temes van ser inéditos y nun van tar nel so próximu discu. Dark-la-eMe amás tamién va collaborar nel próximu discu de Dixebra rapeando nun bonus track xunta Navarro del grupu "Alegre y combativo".