Abondes novedaes nel X Festival Derrame Rock

Esta selmana la organización del festival "Derrame Rock" enseñó-yos a los medios de comunicación el recintu polideportivu d'Agones (Pravia), onde va celebrase'l Derrame Rock d'anguaño pal mes de xunetu. Amás tamién s'adelantó dalgún detalle de los grupos y les actividaes paraleles que vamos poder disfrutar el próximu xunetu.

No que cinca al cartel musical del festival, la organización adelantó que'l vienres van tocar los grupos "Orishas" de Cuba y "A.N.I.M.A.L." d'Arxentina. El sábadu va ser el turnu de los alemanes "Rage". La organización dio anuncia de qu'amás va haber otra banda de renome internacional que ta a poco de confirmase, anque nun quixo adelantar nomes. El festival va pesllase'l domingu 3 de xunetu nuna fiesta de despidida na que van participar ente otros, "Mägo de Oz", "Los Berrones" y "Despistaos", como remate de la final del Concursu de Maquetes del Institutu Asturianu de la Mocedá y "40 Principales Asturias". El cartel completu del Festival Derrame Rock 10, que va tener más de 40 artistes, va anunciase en rueda de prensa'l xueves 31 de marzu.

Tocántenes a les actividaes culturales que se desenvuelven paralelamente al Derrame Rock, la organización adelantó varies d'elles. Ente elles rescampla una esposición fotográfica sobre la única visita del Che Guevara a España. Ello foi que nel añu 1959, el Che diba pa El Cairo como representante del gobiernu cubanu. El so avión fizo una escala en Madrid y El Che aprovechó la ocasión recorriendo Madrid pola so cuenta acompañáu pol fotógrafu Cesar Lucas, que fizo les semeyes d'onde sal el material d'esta esposición. Tamién va haber un video fórum con proyecciones documentales sobre los campos d'esterminiu nazi, nel añu del 60º aniversariu de la lliberación d'Auschwitz. Los alderiques van tar presentes col polémicu tema la piratería, nuna mesa redonda onde se quier que tean toles partes implicaes, incluyida la SGAE. El propiu Derrame Rock tamién va tener el so protagonismu nesti apartáu cultural con una esposición sobre los diez años d'historia del festival.

Tamién va haber un espaciu acutáu pal teatru con "Teatro Margen" que va representar el sábadu'l la so obra más famosa, "WAR!". Amás, la organización del festival tamién ta negociando cola Conseyería d'Industria la instalación nel recintu d'un Mercáu Astur como forma de promocionar l'artesanía y productos asturianos.