Abondes novedaes na olimpiada d'El Garrapiellu

A lo llargo d'esti sábadu y mañana domingu desarróllase nes instalaciones del Muséu del Pueblu d'Asturies en Xixón, la yá tradicional Olimpiada de Deportes Autóctonos, qu'organiza la Tertulia Cultural "El Garrapiellu" y que llega a la so VIII Edición.

Pa esti añu, xunta les tradicionales competiciones de tiru cuerda, valtu o llave o rana, esti añu la organización de "El Garrapiellu" presenta una interesante novedá, la presencia de cinco xugadores de la patefa de Meredo. La patefa ye un xuegu universal -asemeyáu al cascayu en cierta midida pa los profanos y que ta casi desapaecíu, pero qu'en Meredo, un pueblu d'A Veiga, sigue xugándose tolos domingos.

Na modalidá de bolos, Nenaye Carbajal esplicó a Asturies.com que va a a haber batiente, modalidá que va xugáse nuna bolera de Santander desmontable, dempués de que la que punxere "El Garrapiellu" en pueblu d'Asturies desapaeciere cola remodelación del espaciu. Afortunadamente, el Patronatu Deportivu Municipal dio anuncia de que va mercar la bolera desmontable pa que quede como otra bolera permanente. Con ello, Nenaye esplica que yá namás va facer falta una bolera de bolu palma pa tener les boleres de les 4 grandes modalidaes de bolos asturianos, xunta la de cuatriada y la de bolu de Tinéu (o bolu celta) que yá tan instalaes.

Nun acaben equí les novedaes alredor de los bolos nun nesta VIII Edición de la Olimpiada, y asina, xunta la recuperación del bolu de palma otra de les especialidaes minoritaries de bolos de les que va haber demostración va ser la del "bolo rodao", modalidá de Xarrio (Cuaña) que por primer añu ta enxerta na federación. Esta modalidá de bolos asturianos, que taba casi desapaecía y que presenta una particularidá de xéneru abondo especial por ser los únicos bolos nos que tradicionalmente xueguen muyeres. Finalmente, va volver a intentar batise'l record Guiness de tiru de gomeru.