Abondante ufierta de conciertos pa esti fin de selmana

Kent Steedman en Xixón, Carlos Segarra con Jorge Martínez en Pravia, y l'actuación doble de Matthew Sweet y Matt Sharp rescamplen nun fin de selmana estráu de conciertos de tolos estilos.

El músicu australianu Kent Steedman va llegar esti sábadu a Xixón p'actuar xunta The Tubular Greens, una banda de músicos españoles que van acompañalu nos conciertos que dea pela península y na que figura xente como Fernando Pardo, dela banda de rock y power-pop Sex Museum. Steedman, ún de los guitarristes más importantes d'Australia, fundó a últimos de los 70 "The Celibate Rifles" . Nel conciertu que van dar el sábadu a partir de les 22:30 na sala Albéniz de Xixón van recorrer la historia del rock oceánicu, con temes d'AC/DC, Radio Birdman, Rose Tatoo o The Saints xunta les composiciones del mesmu Kent y del so grupu Celibate Rifles.

Esi mesmu día, pero a una hora más pa xente dao al tresnoche, la sala "El Jardín" de Xixón tien pop a embute col conciertu de Matthew Sweet y Matt Sharp, que celebra los venticinco años del "Escocia" ún de los clásicos de la nueche de Xixón. Mientres Matt Sharp ye ún antiguu componente de la banda Weezer, que sonaron muncho per equí gracies a una campaña d'una casa de telefonía, Matthew Sweet pasa por ser un compositor de pop-rock con toques de power pop y del que toles crítiques emponderen el so talentu pa lo melódico.

D'otra manera, el club rockeru "Ann Alley" tien preparada pa la nueche del sábadu una sesión de rock na que van participar el grupu Bourbon, Igor Pascual, (ex - Babylon Chat) y el famosu Carlos Segarra, líder de "Los Rebeldes". El programa anuncia tamién que Jorge Martínez, de "Ilegales" va xubir al escenariu a tocar con Segarra.

Una actuación del grupu "The Punishers" en Candás, la presencia de "Los Chichos" en Xixón güei vienres o la presentación na FNAC el domingu del discu de bandurria d'Hector Braga son delles más de les cites musicales del fin de selmana, que puen consultase n'axenda d'ociu Asturiactiva.