Abiertu'l plazu d'inscripción pal Cuartu los Valles

Yá ta abiertu'l plazu d'inscripción pal concursu de música folk "Cuartu de los Valles" de Navelgas, qu'anguaño va celebrase el 22 de xunetu.

Esta va ser la quinta edición d'esti concursu qu'acueye la localidá tinetense de Navelgas. N'ediciones anteriores ganaron bandes como "Balbarda" de Madrid l'añu pasáu, los cántabros "Cambera'l cierzu" nel 2002, "Antubel" de Lleón nel 2001, o los asturianos "Llangres" na primer edición. P'apuntase esti añu namás qu'hai tener un grupu de trés o más componentes y unviar enantes del 31 de mayu una maqueta o discu editáu con un mínimu de cuatro temes a la dirección del V Concurso folk "Cuarto de los Valles". Casa de la Cultura. 33873 Navelgas (Tinéu) Principáu d'Asturies. Enantes del 20 de xunu va dase anuncia de cualos son los cinco grupos esbillaos pol xuráu que van participar na final el 22 de xunetu en Navelgas.

Amás de los cinco premios económicos, va editase un discu colos grupos finalistes y la organización va axuntar un númberu importante de directores y programadores musicales col oxetivu de qu'estos grupos finalistes se dean a conocer. Los componentes del xuráu d'esti añu son Iñaki Peña (Trébede -R.N.E.- Radio 3), que va actuar como presidente, José Miguel López ( Programa Discópolis - R.N.E.-Radio 3), Jordi Bertran (Director " Fira Mediterranía de Espectacles " de Manresa y Programador Aytu. Tarragona), Fran Rivera (Director del Festival Intercélticu d'Ortigueira), Mario Correia (Programador Festivales de Sendim o Vizela en Portugal), Ángel Goyanes (Director de la revista "Interfolk"), Joáo Sa(Radio Vizela , programa "Folkilandia"-Portugal-) y Alberto Jambrina y Pablo Madrid (Consorciu de Fomentu Musical de Zamora).