Día del Llibru Asturianu

Abiertu’l plazu p’apuntase a la Escuela de Branu d’Asturianía

|

El Boletín Oficial del Principáu d’Asturies (BOPA) espublizó esti xueves les bases pa participar na cuarta edición de la Escuela de Branu d’Asturianía. Los interesaos tienen 20 díes naturales dende’l vienres p’apuntase a esta iniciativa pa emigrantes.
 
Nesta ocasión hai disponibles un total de 26 places pa disfrutar de la Escuela de Branu d’Asturianía: 12 pa la modalidá de gaita y 14 pa la de baille. Éstes tán destinaes a persones nacíes n’Asturies o descendientes d’asturianos que tengan 18 años cumplíos, sían socios de dalgún centru asturianu y cuenten con esperiencia na modalidá na que s’apunten, amás de nun haber participado nes tres ediciones anteriores. El programa de la cuarta edición de la Escuela inclúi 300 hores llectives, distribuyes en tres cursos o niveles a desarrollar nel mes de xunetu del 2011, 2012 y 2013. El primeru celebrarase n’Uviéu ente’l 16 y 30 de xunetu d’esti añu.
 
La Escuela de Branu d’Asturianía, entamada pol Conseyu de Comunidaes Asturianes, tien como oxetivu formar monitores en cultura y música tradicional asturiana pa que puedan tresmitir los sos conocimientos a los centros asturianos a los que pertenezan. Hasta’l momentu, 75 persones beneficiáronse d’esta iniciativa formativa: 20 na primer promoción, que terminó nel 2004; 25 nel 2007, na segunda; y 30 el branu pasáu, na tercera. Les persones que quieran participar na cuarta deben ponese en contautu col Conseyu nun plazu de 20 díes naturales dende mañana.
 
Hai que destacar que, amás de la Escuela de Branu, el Conseyu entama tamién cursos d’estensión naquellos centros asturianos onde haya demanda. Asina, nel 2010 desarrolláronse n’América un total de 8 cursos nos que participaron un total de 139 alumnos: 107 na modalidá de baille y 32 en gaita. Mentes, nos centros asitiaos nel territoriu estatal, impartiéronse 13 cursos nos que participaron 401 persones.

Contador Estadistiques