Abiertes les votaciones pa los XII Premios AMAS

La gala va celebrase'l 24 de febreru nel uviedín Teatru Filarmónica.

Dende ayeri y hasta'l 6 de febreru van tar abiertes les votaciones nes 22 categoríes que conformen los XII Premios Anuario de la Música Asturiana (AMAS), a los que tán nominaos 88 artistes y grupos. Como vien siendo habitual, la participación ye bien alta, con más de 14.000 votos en 24 hores.

Son dellos los artistes qu'empleguen la llingua asturiana, tanto de forma habitual como puntual, qu'aspiren a llevase un gallardón. Asina, Nano d'Angelo (Desakato) ta ente los cuatro nominaos a Meyor Batería; Xaime Arias, a Meyor Teclista; Rigu Suárez, a Otros Instrumentos; y Rodrigo Cuevas, a Artista Revelación.

Na estaya de Gaita, foron escoyíos la Banda de Gaitas La Laguna del Torollu, la Banda Gaites Naranco, la Banda Gaites Villa de Xixón y el Grupu Folclóricu Prau Llerón de Mieres; mentes que na de Meyor Canción Folk compiten 'A lo ḷḷixero' (La Nueve), 'A pause in New York' (Bras Rodrigo), 'El precio de un sueño' (The Hidden Road) y 'Suaños al alba' (Banda Gaitas Teixo Manolo Quirós); y na de Meyor Discu Folk, 'A pause in New York (Bras Rodrigo), 'Con estes y otres palabres' (Fernando Valle Roso), 'L'espoxigue' (Banda Gaites Conceyu de Siero); y 'Suaños al alba' (Banda Gaitas Teixo Manolo Quirós).

D'igual forma, Desakato aspira al Meyor Discu Rock, con 'La teoría del fuego', y el Studio Llunik a la Meyor Portada y Diseño por 'Prince of Verdiciu' de Rodrigo Cuevas.