Abierta la matrícula pa la prueba de conocencia de l'ALLA de xineru

L'esame va celebrase'l sábadu 25 y, como novedá, la inscripción pue tramitase al traviés de la web de la institución académica.

“L'Academia de la Llingua Asturiana, sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu”, ta acabante d’abrir la matrícula del primer de los dos pruebes que celebra tolos años –la segunda ye en mayu–, que sirve pa que tolos ciudadanos interesaos puedan algamar el documentu qu’afita la so conocencia d’asturianu nel nivel 1 o básicu. Pa ello han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu.

La prueba cuenta con dos partes, escrita y oral. La primera va principiar con un dictáu, pa continuar con una torna, una serie d’exercicios gramaticales y una redaición. Darréu, l’aspirante a algamar el títulu de conocencia pasará a otra sala u caltendrá una conversación breve con dalguna persona del xuráu que valorará’l so dominiu oral del idioma.

Les persones interesaes en facer la prueba de conocencia tienen de plazu hasta'l día 23 pa formalizar la matrícula na web de l'Academia de la Llingua Asturiana (ALLA), con un preciu de 20 euros, o na so sede nel horariu siguiente: de llunes a xueves de 9 a 15 y de 16 a 19 hores, y el vienres de 9 a 14 hores. L’esame va comenzar a les 9.30 hores del día 25 y va celebrase nel propiu llar de la institución (L’Águila 10, Uviéu).