Abierta la inscripción pa participar nel Concursu Rock ‘Ciudá d’Uviéu’

Dende esti llunes y hasta’l 8 de setiembre va permanecer abierta la inscripción pa participar nel XIV Concursu Rock ‘Ciudá d’Uviéu’. El grupu vencedor lleva un premiu de 6.000 euros y gana’l derechu d’actuar nel San Mateo próximu.
 
Asina, el grupu vencedor de la edición del añu pasáu, los ḷḷenizos Mokomitas, van actuar na Plaza de la Catedral el llunes 19 de setiembre xunto con Jorge Ilegal y Los Magníficos, y Carlos Baute. P’algamar esti ésitu, los grupos que participen nel ‘Ciudá d’Uviéu’ han de competir con otres 34 bandes pa convencer al xuráu de que merecen tar ente les cinco meyores que disputen la final. El segundu y tercer clasificaos tamién van llevar premiu, nesti casu de 4.000 y 2.000 euros, de manera respeutiva.
 
Nel concursu pue participar cualquier grupu o solista asturianu que presente na Oficina Municipal de Turismu ‘L'Escorialín’ (cai Marqués de Santa Cruz) el documentu d’inscripción y una grabación sonora que tenga, al menos, tres cantares orixinales. D’ente toles propuestes, la organización va escoyer a les 35 meyores pa depués proceder al sortéu de los horarios d’actuación. La plaza de Feijoo va acoyer tolos conciertos, de 30 minutos de llargor por banda, ente los díes 16 al 18 de setiembre, y del 21 al 25.
 
La novedá d’esti añu ye la decisión de la Sociedá Uviedina de Festexos de retrasar l’aniciu de l’actividá del concursu a les 21 hores cola fin de respetar la xornada académica universitaria, atendiendo asina les demandes de la Universidá d’Uviéu. Nos díes non llaborables, les pruebes de soníu van poder celebrase pel día y los conciertu principiarán nel horariu habitual: les 21 hores.