Abierta la convocatoria pal XIV Concursu Manuel Nevado Madrid de microrrellatos mineros

|
Abierta la convocatoria pal XIV Concursu Manuel Nevado Madrid de microrrellatos mineros

El plazu pa presentar creaciones n'asturianu o castellanu fina'l 23 d'ochobre.

Mañana va celebrase la presentación del XIV Concursu de Microrrelatos Mineros Manuel Nevado Madrid, eventu lliterariu que Fundación Juan Muñiz Zapico, de CC OO, convoca de manera añal pa recordar la figura del históricu líder mineru antifranquista. Va ser nun actu en La Nueva, na Casa d'Aseos Ecomuséu Valle de Samuño, que va contar coles intervenciones de Benigno Delmiro Coto, presidente del xuráu, y Damián Manzano, secretariu xeneral d'Industria de CC OO d'Asturies, dende les 19.30 hores (entrada llibre a les 19.15 hores o visita guiada a les instalaciones nel tren, asina como al pozu, a les 18 hores con una tarifa promocional especial).

Tamién va aprovechase pa presentar el llibru qu'axunta los rellatos más destacaos de la edición pasada, que ganó 'Ardor', de Pablo Rodríguez Medina, escritor que tien confirmada la so asistencia, y pa facer una llectura de los mesmos. Na estaya d'asturianu, el testu merecedor del gallardón foi '1962', de Lluís Aique Iglesias, recibiendo mención Inaciu Galán, con 'El silenciu de la mina'; Valentín Moro, con 'Relevu de la tira'; y Armando Gutiérrez Rodríguez, con 'L'españíu'.

El día 23 d'ochobre va ser el caberu pa presentar trabayos pa esta decimocuarta edición del concursu, que caltién recompenses de 600 euros pal ganador, de los que 300 son en metálicu y el restu un llote de llibros y un grabáu de Manuel Calvo, y de 350 euros, siendo 200 la cantidá entregada en mano más un llote de llibros, pal áccesit d'asturianu –tolos testos opten al primer premiu–. Tamién hai accésit de testimoniu históricu (250 euros) y otru de mocedá pa los menores de 26 años (250 euros).

El fallu del concursu va facese, como ye vezu, el 4 d'avientu, festividá de Santa Bárbola. La xente interesao en participar pue consultar les bases nesti enllaz.

Contador Estadistiques