Abierta la convocatoria pal certame mozu "nun nos cuentes películes, failes"

Por tercer añu siguíu, el Conseyu de la Mocedá del Principáu d'Asturies, el Festival Internacional de Cine de Xixón y la Ciudá Tecnolóxica Valnalón col patrociniu de Telecable, entamen el Concursu pa productores cinematográfiques moces "Nun nos cuentes películes, ¡¡failes!!"

El proyectu, que pretende afalar la capacidá d'iniciativa, la creatividá, el trabayu n'equipu y l'espíritu emprendedor ente la mocedá asturiana, nació de siguir les directrices de la Unión Europea sobre promoción de la mocedá, garrando'l cine como representante d'una industria creativa na que la xente mozo pudiere facer la transición de participar como consumidores a tresformase en profesionales del sector.


La modalidá escoyida ye otra vuelta más el documental, y na convocatoria acláriase que los participantes han presentar proyectos baxo'l prisma de la realidá de la mocedá y les cuestiones que l'arrodien. Los proyectos ganadores van tener como premiu la realización del documental que se proponga facer, pa lo que les entidaes que patrocinen van apurrir tolos medios precisos, y la so presentación na próxima edición del Festival Internacional de Cine de Xixón. El plazu de presentación de proyectos de documentales acaba´l 31 de mayu de 2005.
Más información na web del Conseyu de la Mocedá d'Asturies