Abbas gana les elecciones en Palestina

El candidatu oficial reivindica un estáu palestín independiente mientres el candidatu independiente Mustafá Barghuti, segundu na votación, diz que va impugnar el resultáu

Los palestinos de Gaza y Cisxordania escoyeron a Mahmoud Abbas como socesor del desapaecíu Yasser Arafat al frente de l'Autoridá Nacional Palestina. Mahmoud Abbas, al que se conoz tamién como Abbu Mazén, proclamó'l so trunfu y declaróse como socesor del espíritu d'Arafat, reivindicando un estáu palestín independiente d'Israel y dedicándo-yos el trunfu a los palestinos presos.

El doctor Mustafá Barghuti, segundu nes votaciones, denunció pela so parte les irregularidaes nel procesu electoral, ente les que sorrayó la esistencia de casos de doble votu, el que delles urnes tuvieren abiertes hasta más de dos hores dempués de terminar el plazu llegal pa votar o l'ausencia de los censos de cientos de ciudadanos que nun pudieron votar nunes elecciones que tuvieron oficialmente un 64% de participación ente'l 1,1 millón de palestinos con derechu a votu, derechu que nun tienen los cerca de 4 millones de palestinos nel exiliu.

Con too y con ello, la participación foi muncho más baxa que nes elecciones del 96 que-y dieron la presidencia a Arafat. Ente les escenes d'irregularidaes, la BBC daba anuncia d'una urna de Xerusalen Este'l onde'l recuentu asoleyaba trés vegaes más papeletes que l'asistencia real de votantes.

Más información :
Especial de la BBC, Especial del Jerusalem Post, Intifada Electrónica