A vueltes col cable nes cuenques

El viceconseyeru Luis Iturrioz sacó ayeri otra vuelta'l tema de la entrada de la rede cable de freba óptico nes cuenques mineres. Iturrioz punxo fecha pal cableáu del Nalón y el Caudal p'Agostu o setiembre d'esti añu, y la fórmula emplegada pa ello podría ser la d'una empresa de titularidá pública creada a costafecha pa facer esta obra. El Principáu quería de mano convocar un concursu y alxudica-y la obra a un operador, pero'l Ministeriu d'Economía torgó tala posibilidá porque la obra, que se fadría con perres públiques de los fondos mineros, acabaría apurriendo un serviciu en manes d'empreses particulares.

Eses mesmes subvenciones de los fondos mineros foron les qu'emplegó va yá seyes años Telecable pa meter la rede per Xixón, Uviéu y Avilés, lo qu'ocasionó un pequeñu espolín en Congresu de los Diputaos sobre la llexitimidá de da-y 511 millones de pesetes a esparder la rede d'una empresa particular por muncho que'l serviciu fuere públicu y necesariu. Precisamente Telecable yera la empresa que se suponía que diba a cablear les cuenques, y de fechu'l ramal de cable yá llega a les cabeceres de los dos valles, pero yá l'añu 2.002 Roberto Paraja, presidente de la filial d'Hidroeléctrica, dio a entender que'l proyectu yera muncho pa ellos solos. En declaraciones al periódicu "La Gaceta de los Negocios" Paraja esplicó que meter el cable peles cuenques mineres yera un proyectu que la compañía nun podía facer porque perpasaba los sos recursos propios y el tope de delda que podía asumir. Yá entós Paraja pidió ayuda de l'alministración, una ayuda que peritaba nunos 12 millones d'euros, cerca de la cuarta parte de la facturación total de la empresa.