A vueltes col asturianu na TV

Tres de l'anuncia que fizo la portavoz del Gobiernu asturianu de que la TV asturiana va entamar a emitir a últimos d'esti añu, el debate sobre'l modelu llingüísticu pol que tien de mandase la TV autonómica torna al primer planu. La Xunta Pola Defensa de la Llingua criticó otra vuelta esta selmana la falta de compromisu de la futura canal autonómica col idioma del país. La organización cívica de defensa del idioma, que siempres defendió una canal qu'emitiere al 100% n'asturianu interpretó tamién les declaraciones de Jorge Fernández León, director de l'Axencia de Desarrollu de Proyectos del Principáu y ún de los másimos responsables de la TV.

Según el comunicáu de la Xunta, nestes declaraciones, Fernández León dicía que nun diba afitase política llingüística na TV en cuantes qu'ello podía suponer una interferencia na soberanía del Conseyu d'Alministración del ente. La Xunta pescancia qu'esti argumentu ye hipócrita y nun se tien porque'l Conseyu d'Alministración de la TV sal d'una decisión política que tomen "a deu" los dos partíos políticos que tan en en gobiernu, entidá que tien que facer la política llingüística. La Xunta quéxase tamién en comunicáu de que tien pidíes solicitúes d'entrevista con responsables del gobiernu, PSOE y Izquierda Xunida y col mesmu Jorge Fernández León ensin que recibieren rempuesta nenguna