“A un derechu nun se-y pon preciu nin se negocia con dineru”, recuerda Ángela Vallina

Izquierda Xunida (IX) insiste na necesidá de separtar la negociación de la reforma del Estatutu y la presupuestaria. “A un derechu nun se-y pon preciu nin se negocia con dineru”, recordó la vocera parllarmentaria Ángela Vallina, mentes que’l coordinador xeneral Ovidio Zapico alertó de la peligrosidá d’allargar los plazos.

La coalición confirmó ayeri la so disposición d’estudiar les propuestes de Foro, partíu que pondría’l necesariu votu 27 pa la reforma del Estatutu d’Autonomía, pero caltúvose firme na posición de separtar esta negociación cola presupuestaria. Asina, Zapico rescampló qu’IX ye una formación “firmemente comprometida col Estáu Social y cola so construcción”, lo que, “evidentemente choca cola posibilidá d’eliminar impuestos a les rentes altes, impuestos como ye’l casu de socesiones”.

“A un derechu nun se-y pon preciu nin se negocia con dineru”, intervino Vallina enantes de calcar Zapico nun aspeutu mui importante como ye’l de los plazos. “Nosotros, y xunto con Podemos Asturies, presentamos yá hai seis selmanes un calendariu qu’entendemos que ye l’únicu calendariu que permitiría concluyir la tramitación, non n’Asturies, sinón nel Congresu de los Diputaos, que ye onde fina la tramitación definitiva del Estatutu nel marcu d’esta llexislatura. Tolo que sía dir más allá del calendariu que nel so momentu IX y Podemos proponíamos va suponer que nos acerquemos, cada día más, a una reforma del Estatutu que pueda ser fallida”, aseguró.