“A nosa cultura y as nosas llinguas son tamén un patrimonio al que nun se pode renunciar”, afirma'l presidente Barbón nel so mensaxe de fin d’añu

|
Adrián Barbón mensaxe de fin d'añu 2020

El presidente Adrián Barbón incorporó’l gallego-asturiano al so mensaxe de fin d’añu. “A nosa cultura y as nosas llinguas son tamén un patrimonio al que nun se pode renunciar”, aseguró al tiempu que recordó n’asturianu qu’esti 2021 se cumplen 40 años de l’aprobación del Estatutu d’Autonomía d’Asturies.

“Rafael Fernández, primero, y Pedro de Silva, depués, encargáronse d’empobinar un tránsitu históricu que más tarde siguieron los presidentes del Principáu, que los sos retratos acompáñenme agora”, apuntó en Presidencia enfrente de los cuadros de los dos primeros dirixentes d’Asturies en Democracia. “Tampouco entoncias eran tempos fáciles, pro el empuxe y a ilusión puideron cos frenos del medo y a rocea. Nel dous mil ventiún temos que tar decididos a asumir outros empeños: superar a pandemia, empezar a reactivación, tresformar Asturias con úa industria verde, dixital y sostible. Y hoi como ayer temos que saber qu’a nosa cultura y as nosas llinguas son tamén un patrimonio al que nun se pode renunciar, que tar arguyosos de nosoutros mesmos nun nos ata al pasao, senón que nos impulsa a ganar el futuro”, cambió darréu a la llingua del occidente del país, qu'usa per primer vegada nun mensaxe de fin d'añu.

Yá en castellanu, tuvo pallabres pa la emigración: “A ellos, que llevan Asturias consigo por dónde quiera que van, que nunca la pierden de vista por lejos que estén y que han sido tantas veces ejemplo de iniciativa y compromiso, les prometo que seguiremos trabajando para mejorar su querida tierra. Por ellos también debemos vencer la epidemia y atrevernos a recorrer nuevos horizontes”.

La pandemia ocupó gran parte del mensaxe del presidente, recordando en primer llugar a los 1.500 finaos con COVID-19 y les sos families, y agradeciendo’l so trabayu al personal sanitariu. Tamién a les neñes y neños pol so comportamientu.

Dos xeres importantes

Nun faltó la referencia a los Prespuestos aprobaos ayeri con un consensu ampliu, “otra noticia esperanzadora”. Llueu citó como los dos grandes desafíos “asegurar la competitividad de nuestra industria en condiciones homologables a las de otros países de la Unión y aprovechar al máximo los fondos europeos”, momentu nel que cambió al asturianu.

“Dambes xeres van riquir lo meyor de nós: firmeza, tesón, intelixencia ya iniciativa. Cola defensa de los intereses d’Asturies per delantre de cualesquier otra condición, el mio gobiernu ta dispuestu a liderar la consecución d’eses metes, ineludibles p’avanzar na nuestra tresformación y asegurar el porvenir. Esa ye la idea central de los que denominé va meses Pactos de Fruela, que yá tienen dos concreciones: la concertación y los presupuestos, les dos frutu d’un diálogu ampliu y sinceru, la meyor vacuna contra’l virus de la crispadura. Encaremos esos retos xuníos y ensin mieu a los cambeos. Toos tenemos de ser aliaos a la hora de trabayar pol bien d’Asturies”, reclamó.

Contador Estadistiques