A la venta l´últimu discu de Nosoträsh

"Cierra la puerta al salir" ye como s'entitula'l cuartu
trabayu discográficu de la banda de pop Nosoträsh que yá ta
nes tiendes.



Probablemente les mayores y más veteranes representantes del pop
de corte independiente n'Asturies tán acabantes de sacar nuevu discu.
Nosoträsh nació al abellugu
de la corriente musical que marcó Xixón nos años 90, pero
nel so casu fueron quien a resistir colos años, sobrevivir a la moda, y
nun ser una víctima más de la maquinaria. Dende aquel "voy a
aterrizar" del añu 1995 hasta güei pasaron munches coses na
banda, tanto nes persones como na música, colo que'l grupu llega a esti
puntu con una madurez que-yos permite facer, sobre too nes lletres, lo que-yos
da la gana. Ello ye que nos trece temes del discu tamos énte una
"arguyosa declaración d'intenciones, dedicada esta vez a toos
aquellos y aquelles que tengan planes nuevosa la vista", como lo definen
dende la so discográfica Elefant
Records.



El discu grabóse los fines de selmana en Xixón d'una
manera mui tranquila y meditada. Dempués de trabayar col productor Ibon
Errazkin (Le Mans) nel discu anterior Popemas, el grupu apostó pa esti
por productores del país como son Xel Pereda (Llan de Cubel) y Pedro
Vigil (ex-componente de Penelope Trip y cabeza pensante d'Edwin Moses y Vigil).
Amás tamién contaron cola collaboración del cantautor
vascu Jabier Muguruza nel tema "Funambulista". Pa conocer meyor esti discu y al
grupu convidamos a los nuesos llectores a visitar
esta páxina
onde van topar, amás d'información sobre'l grupu, cantares y un
videu del cantar "Dando Vueltas" incluyíu nesti "Cierra
la puerta al salir".