7.805 asturianos punxeron casa fuera d'Asturies nel 2.001

L'Institutu Nacional d'Estadística espublizó va poco los datos de la estadística de variaciones residenciales del estáu correspondiente al añu 2.001. Nesta estadística, l'INE diz qu'Asturies perdió 2.127 habitantes, que camudaron de residencia fixa n'Asturies pa poner casa estable n'otra comunidá. Ello ye resultáu de restá-yos a los 7.805 asturianos que dexaron el país pa marchar a otres comunidaes los 5.658 ciudadanos y ciudadanes d'otres comunidaes del estáu que vinieron a vivir a Asturies a lo llargo l'añu. De los cerca d'ocho mil asturianos que camudaron de comunidá de residencia, los más d'ellos marcharon pa Madrid (1183), anque hai otros destinos mayoritarios más allegaos a la tierrina como Castiella y Llión (1.073) o Galicia (973). La emigración por causa llaboral a la industria turística y de servicios de les islles canaries tamién rexistra una tasa bien alta, atrayendo a 923 asturianos y asturianes.

Per sexos, esta emigración asturiana repártese cásique al 50% ente homes y muyeres, pero per grupos d'edá, el repartu desequilíbrase claramente, siendo los grupos ente 16 y 35 años los que lleven el pesu de la estadística

Los datos del añu 2.001 claven los del 2.000, cuando'l saldu negativu foi de -2187 persones, calteniéndose asina la tendencia de va cuatro años p'acá, en que'l saldu migratoriu pintó siempre negativu p'Asturies. Mirando la tabla entera dende'l 92, Asturies lleva 10 años perdiendo población nesti saldu, pero si hasta'l 97 nunca nun se pasó de -1.040 persones, del 98 p'acá'l saldu ye negativu siempre en más de 2.000 persones.

Contador Estadistiques