50 años del saltu de Grandas

Xunta la construcción d'Ensidesa, el saltu de Grandas foi una de les obres faraóniques de la época franquista n'Asturies. De la que s'inauguró yera'l segundu saltu más grande d'Europa

Nel añu 1954 Avilés yera una ferviella d'obreros que trabayaben na construcción de la mayor cabecera siderúrxica d'España. Milenta persones llegaes dende los puntos más alloñaos de la península (el númberu esactu de trabayadores ye difícil de precisar) vivíen en condiciones infrahumanes pa ser a ganar unes perruques nun tiempu en que la miseria yera moneda común.

Casi al mesmu tiempu, nel occidente asturianu la dinámica de grandes obres del franquismu, esta vegada per aciu del capital particular d'Hidroeléctrica del Cantábrico y Electra de Viesgo, llevantaba otra macro-obra, la del Saltu de Grandas, nel ríu Navia. Nun tiempu en que malpenes nun había maquinaria d'obra público y too tenía de facese a picu y pala, un báramu d'obreros que se perita ente les 4.000 y les 6.000 persones llevantó un embalse y un saltu qu'entovía güei son ún de los monumentos más espectaculares que puen visitase nel occidente astur. Con 30 kilómetros de llargo y capacidá pa 270 millones de metros cúbicos d'agua, l'embalse apurre agua dende los sos 112 metros d'altura a les turbines del saltu, que produz por términu mediu 320.000 kwh al añu.


La obra entamare nueve años primero, nel 1945, y dende entós hasta que se remató la gran muria del embalse, Pezós y Grandas vivieron una ferviella en proporción más grande que la que-y tocó sufrir a Avilés. Nun tiempu de miseria y necesidá, la cantidá de xente que viniere de fuera a trabayar nel saltu convirtió aquellos dos conceyos de Os Ozcos nun "far west" a l'asturiana, con tolo qu'ello lleva arreyao. Los casos de violencia, los robos y la prostitución qu'acompañaron la obra llevaron a la xente del llugar a aplicá-yos a los foriatos un nomatu descalificativu. Neto que los avilesos llamaben "coreanos" a los trabayadores de la obra d'Ensidesa, los de la presa convirtiéronse en "salteros" un nome col que los que llegaron a asitiar nel llugar cargaron tola vida.

Xunta les güelgues humanes, la obra del saltu dexó otra mayor nel paisaxe. L'embalse cubrió con agua más de 800 hectarees de suelu y solo na parte asturiana de la presa quedaron munchos pueblos somorguiaos. La parroquia entera de Riudeporto, compartida ente Galicia y Asturies, desapaeció dafechu, y xunta ella los pueblos de San Feliz, Sancedo, Duade, Veiga Grande, Saborín y A Quintá, a los qu'hai qu'amestar Salime, anque entovía güei, cuando baxa'l nivel del agua, como cuando va 4 años que se fizo una llimpieza xeneral, puen vese los restos de les cases tapaes pola basa del embalse. Sicasí, la destrucción d'aquellos pueblos vieno acompañada de la construcción d'otru nuevu, A Peicega, el pobláu qu'abellugó a bien de trabayadores del saltu y qu'anguaño ta despoblau lo mesmo que munchos pueblos que nun llevó l'agua pero que tan vacios dafechu per aciu de la crisis del mediu rural, anque en dellos sobreviven dende comunes y asentamientos que son un resclavu de la fola hippie de los 70. Diz la xente del llugar que, anque los praos y cases llevaben años espropiaos, siguióse viviviendo nellos hasta que se terminó l'embalse y l'agua entamó a xubir dándose la escena de ver a bien d'aldeanos fuxendo col ganao mientres nel agua flotaben barriques de vino y tola trolla de madera de les cases.

N'otru paralelismu macabru cola Ensidesa d'Avilés, tamién en Grandas morrieron bien d'obreros. Anque nun hai estadístiques que digan cuanta xente perdió la vida na construcción de la presa, los murales de Joaquín Vaquero Turcios qu'adornen la sala de xeneradores de la central hidráulica de Grandas guarden un güecu pa l'alcordanza d'aquella xente, anque, no que cinca al arte de la central, el nome que más pesa ye'l de Joaquín Vaquero Palacios, padre del pintor y arquitectu que diseñó'l saltu y los relieves que lu adornen.

Con motivu del aniversariu del saltu, el Muséu Etnográficu de Grandas tien puesta una esposición de semeyes qu'enseñen les distintes fases de construcción d'esti monumentu industrial. Aparte d'ello, les empreses propietaries faen posible la visita a les instalaciones, pa ello nun hai más que llamar al teléfonu 985 62 70 01 y acutar cita.