40 proyeutos d'entidaes ensin ánimu d'arriquecimientu benefíciense d'ayudes del programa LEADER

El Valle del Ese-Entecabos ye la zona con más iniciatives con subvención, un total de 6.

El Boletín Oficial del Principáu d'Asturies (BOPA) de güei espublizó la resolución de la Conseyería de Mediu Rural y Cohesión Territoria, correspondiente a la llexislatura anterior, pol que se conceden 466.993 euros n'ayudes del programa LEADER p'apoyar el desendolcu de 40 proyeutos. Éstos son iniciativa d'entidaes ensin ánimu d'arriquecimientu, como asociaciones, fundaciones o clubes deportivos, que desenvuelven la so actividá nes árees d'influencia de los once grupos d'aición local.

La convocatoria ta cofinanciada al traviés del Fondu Européu Agrícola de Desendolcu Rural (FEADER), en concreto un 80 por cientu, por un 14 del Gobiernu y un 6 del Estáu, y cuenta col Valle del Ese-Entecabos, rexón qu'inclúi los conceyos d'Allande, Cuideiru, Salas, Tinéu y Valdés, como'l que cuenta con más propuestes aceptaes, con 6. Ente elles, la pavimentación d'una zona recreativa n'Augüera, l'ameyoramientu del sistema d'abastecimientu d'agua en Valdréu o la rehabilitación de les escueles d'El Pontigón.

L'Altu Narcea Munieḷḷos y Ozcos-Eo, con 5; el Camín Real de la Mesa, Navia-Porcía y Oriente, con 4; Baxo Nalón y l'Asociación pal Desendolcu Integráu del Centru d'Asturies Periurbanu (ADICAP), con 3; Monte Central, con 2; y Altu Nalón, con 1, recueyen el restu de proyeutos con subvención.