4-0 pa ponese últimos

De desastre total pue calificase'l primer partíu del R. Uviéu nesti añu en 2ª B. La ilusión cola qu'encaraba esta nueva temporada l'afición azul frayóse en pocos minutos. Foron 4 goles y pudieron ser unos cuantos más, pa enriba, l'equipu azul nunca nun tiró ente los tres palos en tol partíu, con esto ta too dicho.
Falló l'equipu en tolo que se pue fallar. Lo primero en fallar paez claro que ye'l conseyu, nun hai más que sentir lo que diz la totalidá de l'afición, pero tamién fallaron los téunicos y l'equipu en toles llinies. Falló'l porteru que nunca nun tuvo y si tuvo foi p'armala; falló la defensa que siempre paeció una llinia persegura y el sábadu nun vio una; falló'l centru'l campu, tou de la casa y que paecía tener muncha calidá y creación pero nada de nada, y falló un ataque que nun tiró a puerta en tol partíu.
En fin, desastre total que de xuro va tener consecuencies na campaña socios. Pero esti ye solo'l primer partíu d'una temporada que sedrá llarga y dura. Hai de facese a la nueva categoría lo más pronto posible, les nueves circunstancies faen que l'afición nun vaya ser tán incondicional como otros años, y poro, hai peligru de que los siguidores se cansen. Tienen de cambiar munches coses yá, hai tiempu y solo tres puntos de diferencia col primer clasificáu, viva l'optimismu.