3.720 persones yá recibieron una segunda dosis de la vacuna, garantizada magar los recortes de Pfizer

La disminución de les dosis de Pfizer/BioNtech poles obres entamaes na planta de la farmacéutica estauxunidense na población belga de Puurs p’aumentar la producción nun va afeutar la puesta de la segunda dosis a mayores en residencies y cuidadores, aseguró Concepción Saavedra, direutora xerente del SESPA. N’Asturies yá tán vacunaes dafechu 3.720 persones.

Esta selmana aportaron al país nueve bandexes (1.755 viales d’onde se saquen 6 dosis de caún), dos menos de los previstes, “y entovía asina tamos en situación de poder aplicar la segunda dosis a les residencies y vamos facemos asina enantes de siguir cola primer dosis de los profesionales”, anunció. “Nesti momentu la esperanza ye la vacunación y el nuesu oxetivu ye vacunar el mayor númberu de persones nel menor tiempu posible”, siguó la responsable del Serviciu de Salú del Principáu d’Asturies (SESPA), que nun cuenta con inmunidá importante “hasta mayu o xunu”, cuando haya un porcentaxe grande ente los mayores.

El ritmu de vacunación depende muncho de la producción de les farmacéutiques, pero Asturies tien preparaos “tolos recursos necesarios” pa siguir col ritmu actual, cola alministración del 93 por cientu de les vacunes recibíes –lleguen al país los llunes–. En total, 3.720 persones recibieron dende'l llunes la segunda dosis, que van tar inmunes a la COVID-19 a los 7 díes de la puesta.

Saavedra, otra manera, confirmó qu’un 6 por cientu de les persones refugaron poner la primera, yá sía por decisión propia o por contraindicaciones por infeiciones temporales o patoloxíes.

Tendencia d’incrementu

La direutora xerente del SESPA informó güei xunto con Rafael Cofiño, direutor xeneral de Salú Pública, de la situación epidemiolóxica d’Asturies, que comunicó que la incidencia anguaño nel Estáu ye de 736 casos cada 100.000 habitantes, cuando n’Asturies ta en 352. “Ye más baxa, pero tamos nuna situación esmoleciente porque la tendencia ye d’incrementu”, aseguró.

Asina, el país ta “en situación de riesgu mui altu, con un nivel 4 nos indicadores de tresmisión del virus y nun nivel 3, de riesgu altu, nos indicadores de tresmisión asistencial, especificamente nel indicador d’ocupación hospitalaria”. La tasa de positividá ta, mentes, nun 8,71 por cientu, perriba del 5 por cientu que marca la Organización Mundial de la Salú (OMS) como llende pa tener controlada la pandemia.

Dada esta situación, la Conseyería de Salú amosó ayeri la so preferencia por adelantar el toque de queda a les 18 hores cola fin de torgar un poco más la movilidá pa frenar l’espardimientu del coronavirus SARS-CoV-2. Anguaño l’estáu d’alarma declaráu pol Gobiernu estatal permite afitalu como mui pronto a les diez de la nueche, horariu vixente nesti momentu n’Asturies.

Semeya obra de POOL/ EuropaPress/ Jorge Peteiro.