34.000 electores escueyen mañana al rector

Mañana la Universidá d'Uviéu escueye rector, como vien faciendo dende másde venti años, pero per aciu de la Llei Orgánica Universitaria, va ser la primer votación en que tola comunidá universitaria tea llamada a les urnes. El 19 de mayu, una segunda convocatoria va volver a llamar a la comunidá universitaria a les urnes coles elecciones pa renovar los 300 miembros del claustru

Hasta agora, la elección del rector facíala'l Claustru Universitariu, órganu compuestu por representantes de los profesores, de la plantiya de personal y de los alumnos, pero agora van ser más de 34.000 persones les que participen nuna votación abierta. Ello nun quier dicir tampoco que'l sufraxu vaya ser universal. El votu d'un estudiante nun va valir lo mesmo que'l d'un caderalgu, y el d'un bedel va valir tamién distinto que'l de los otros dos.

El reglamentu apauta cuatro estayes de votu que depués pondérense acordies a unos tantos por cientu. La primera ye pa los profesores que seyan doctores, esti grupu representa'l 53% del votu total. La segunda enxerta al restu del personal docente y investigador, y el so votu en conxuntu va contar el 12%. El votu de los estudiantes, el grupu más numberosu va valir el 25% mientres que'l personal d'alministración y servicios namás cuenta'l 10%.