30.000 euros por regar la veiga

El ministeriu de Mediu Ambiente persigue a los ganaderos del conceyu de Valdés. Eso ye lo que se saca en claro de les declaraciones del sindicatu agrariu COAG-Asturies, que denunció ayeri que de va un mes p'acá,los ganaderos del conceyu valdesán tan recibiendo unes cartes del Ministeriu en que l'organismu gubernamental avísalos de que, feches les prebes afayadices, tienen conocimientu de que tan arrampuñando con agua de los ríos que pasen xunta les sos esplotaciones ensin tener consentimientu pa ello. En consecuencia, el ministeriu que dirixe -en funciones- el polémicu Arias Cañete amenázalos con multes d'importe variable ente los 6.000 y los 30.000 euros.

La organización sindical diz que ye cierto que los ganaderos del conceyu lleven aprovechando, hasta onde se tien alcordanza, l'agua d'esos ríos, de los que tomen una parte del elementu pa regar los praos que tienen nes veigues. Ello ye asina que, contra les acusaciones d'Agricultura, qu'entiende que los ganaderos tan contaminando l'agua y marafundiándolo, COAG diz que l'usu de los calces d'agua polos ganaderos respuende a un modelu tradicional d'esplotación del territoriu y que l'agua que se gasta en regar nun se contamina y que lo más d'ello acaba volviendo al ríu del que se tomó, contribuyendo too ello a la conservación del mediu ambiente.

D'otra manera, el sindicatu que dirixe Marino Fernández diz que mientres qu'ellos lleven dende que se fundó la organización ayudando a los ganaderos a tramitar les llegalizaciones d'agües énte la presión creciente de la burocracia, el Ministeriu dedícase a pone-yos multes astronómiques a ganaderos de pequeñes esplotaciones que tienen, tolo mas, 4 o 5 vaques mientres dexen otros delitos al mediu ambiente ensin investigar. Entovía más, los responsables de COAG tan enritaos sobremanera porque les multes van cae-yos a unos ganaderos que tan ente'l colectivu afectáu poles inundaciones d'esti iviernu, poles que nun vieron indemnización denguna, anque se pidieron precisamente al Ministeriu de Mediu Ambiente