25 metros cúbicos más de galipote

Ayeri siguieron los llabores de retirada de galipote del cargueru Lydia, que'l miércoles pela tarde soltó a la mar parte del fuel que llevaba pa consumu de la máquina propia cuando un remolcador abrió una resquiebra en cascu de la nave de la que maniobraba pa entralu al Puertu d'El Musel. Según datos oficiales del Ministeriu de Fomentu, ayeri recoyéronse 25 metros cúbicos de galipote, 18 d'ellos na playa de Peñarrubia y los demás sacaos directamente del agua, onde'l remolcador Alonso de Chaves diz que retiró la mancha de 100 metros que s'atopare un kilómetru dientro la mar. Esta mancha tenía un total de 4 m3 de galipote, mientres que de pente les planches del barcu siguió saliendo fuel hasta completar 1 m3 de volumen, que se pañó directamente d'alredor del cascu de la nave, que sigue atracada na terminal de graneles del puertu d'El Musel, onde va tener que quedar un mínimu de diez díes hasta que s'igüen los furacos y se pasen les revisiones pertinentes.