25 años d'Alitar Asturies

La sección en llingua asturiana "Alitar Asturies", del diariu El Comercio de Xixón, cumplió nel mes d'abril 25 años de cita fiel colos llectores, siendo asina ún de los suplementos culturales más vieyos de la prensa del Principáu, y un casu sin precedentes na prensa en llingua asturiana.


"Alitar Asturies" vio la primer lluz el 8 d'abril de 1978, de la mano d'una camaretada de mozos entusiastes que trabayaben dientro de la organización "Conceyu Bable" de Xixón, nel ambiente de ferviella reivindicativa propia de la Transición y na llinia del movimientu de recuperación llingüística del Surdimientu, nacíu cuatro años antes. L'entós director d'El Comercio, Francisco Carantoña Dubert, dio acoyida a la sección qu'agora cumple'l cuartu de sieglu.
"Alitar Asturies" nun yera la primer sección n'asturianu qu'apaecía nes páxines d'El Comercio. Tiempu enantes -nos primeros tiempos de la Transición- viera la lluz la sección "Estaya Rexonal", que tamién coordinaba'l "Conceyu Bable" de Xixón y que desapaeció por causes indeterminaes.


Nos primeros años de "Alitar Asturies", la coordinación nun taba mui definida. Miembros activos de "Conceyu Bable", comu Nel Ricardo Álvarez Morán "Nelo" (a quien se-y debe'l nome de la sección), Adolfo Alonso, Carlos Rubiera, Ramón d'Andrés, Costante Álvarez o Andrés Solar, yeren los que s'ocupaben d'ella, sobre manera los tres últimos. Llueu ye Ramón d'Andrés quien nos primeros ochenta entama a llevala dafechu y de manera regular. Depués, a lo llargo de casi tolos años ochenta faise cargu d'ella Manuel d'Andrés "Mánfer". Dende 1991 ye otra vegada Ramón d'Andrés quien la coordina, hasta que n'ochobre del 2002 -coincidiendo con delles reformes del diariu- céde-y el puestu a Xurde Fernández, que ye'l que s'ocupa anguaño de facer llegar a los llectores esta histórica sección asturianista.
"Alitar Asturies" -a lo primero selmanal, llueu quincenal- nació col oxetivu d'ufrir a los llectores un accesu a la llingua asturiana na prensa, y esti oxetivu sugue vivu güei.

Los conteníos fueron siempre pervariaos, con predominiu d'información de l'actualidá cultural alredor del asturianu, artículos d'opinión sobre cualesquier tema, y collaboraciones lliteraries. Nesti sentíu, "Alitar Asturies" ye una obligada fonte de documentación si se quier conocer en fondura la creación lliteraria en llingua asturiana nos últimos 25 años, pues peles sos páxines pasaron abondos escritores conocíos, que dacuando publicaron en "Alitar Asturies" pela primera vez.
Nel añu 1991, el diariu El Comercio recibió'l Premiu "Andrés Solar" pol llabor en favor de la llingua asturiana, desarrolláu gracies a la so sección "Alitar Asturies". El Premiu, concedíu añalmente por un xuráu de la Xunta pola Defensa de la Llingua Asturiana, entregóse nos locales del Atenéu Obreru de Xixón, y en nome del diariu recoyólu Francisco Carantoña Dubert y los responsables de la sección.
Felicitaciones a "Alitar Asturies" pol so primer cuartu de sieglu.