150 músicos soscriben un manifiestu de la SGAE pola música “de raigón”

La Sociedá Xeneral d'Autores presentó esta mañana'l manifiestu pola música "de raigón" que firmen 150 músicos y profesionales de la música, ente ellos los grupos asturianos Llan de Cubel y Nuberu y los gaiteros José Ángel Hevia y "Guti".

El manifiestu que se presentó esta mañana na sede de la SGAE d'Uviéu atropa toles músiques folk y tradicionales definiéndoles como música "de raigón" y propón dellos puntos pal reconocimientu y prestixu d'estos estilos y del colectivu d'investigadores y intérpretes que lu faen posible. El manifiestu diz reivindicar la música folk y tradicional "en cualquiera de les sos variantes como seña d'identidá de les nuestres Comunidaes y del nuestru fechu cultural énte'l mundu". La SGAE defende que la música "de raigón" ye la que meyor representa los valores de diversidá cultural que defenden la mesma SGAE y la UNESCO, urxendo la preservación d'esti patrimoniu de l'amenaza que supón "la globalización colonizadora del pensamientu únicu".

N'otru de los puntos, el manifiestu de la SGAE espón la receptividá del gran públicu pa con estes músiques, cosa que la SGAE defende con datos, y ello ye que según los datos de la sociedá d'autores, la música "de raigón" yá ye'l segundu xéneru con más ventes per detrás del pop, llegando dacuando a cuotes del 27% del mercáu y teniendo un pesu mui grande nes programaciones culturales, sobremanera les del norte peninsular. Datos que pa la SGAE faen de la música tradicional "factor xenerador de riqueza y bien patrimonial de primera magnitú"

La SGAE empondera tamién la importancia de la música "de raigón" pa la renovación del acervu musical al traviés de la reiterpretación y l'adaptación, defendendo la figura del arreglista como "trabayu creativu que contribuye a que les melodíes sigan tresmitiéndose de xeneración en xeneración" defendendo pa ellos l'accesu al derechu d'autor. De fechu, esta reivindicación toma'l cuerpu central del manifiestu que se presentó esta mañana, esplicándose nelli que ye preciso dignificacar al autor de música de raigón na so condición dual como artesanu de melodíes inspiraes en la tradición o bien como arqueólogu y restaurador del nuestru patrimoniu musical". Pa la SGAE "la comunicación del nuestru fechu diferencial ye determinante pa estremanos como pueblos singulares contra esa globalización agresiva y mercantil qu'unifica los discursos".