110 places na enseñanza asturiana na ufierta pública del 2006

La ufierta definitiva d'Educación sí xube'l númberu de places pal cuerpu de secundaria respective a otres ufiertes anteriores, llegando a les 89, pero baxa les ufiertes de places n'otres especialidaes nos cuerpos docentes de Formación Profesional, Escueles d'Idiomes y Música y Artes Escéniques.

Asina, la convocatoria de places pa secundaria va tener anguaño 5 places pa música y Educación Física, 6 pa Matemátiques, Filosofía, Inglés y Tecnoloxía. 7 son les places en Formación y Orientación Llaboral, Historia y Francés, 8 en Sicoloxía, 9 en dibuxu 12 en Llingua Castellana y Lliteratura, que ye la que más ufierta va tener.

Pa les escueles d'Idiomes van convocáse trés places d'alemán, mientres que na FP van salir 8 de Caltenimientu de Vehículos, 2 places de Peluquería y 8 de Servicios a la Comunidá. En Música y Artes Escéniques y Artes Plástiques y Diseñu nun van convocase places.

El sindicatu d'enseñanza SUATEA llama l'atención sobre les "peculiaridaes" que-y abulta que tien la convocatoria y que se refieren a la situación que va carecer el colectivu d'interinos nesta convocatoria d'oposiciones. SUATEA denuncia que, mientres qu'ello lleven años trabayando pa que se dea un accesu a la Función Docente nel que cuenten los méritos de los interinos con más esperiencia p'afayar un accesu escalonáu a la profesión, los demás sindicatos d'enseñanza roblaron un alcuerdu cola alministración que dicen que nun va suponer avance nengún nesti sentíu. SUATEA llamenta que'l Decretu que tien d'apautar d'agora en p'alantre l'accesu de los interinos a la Función Pública entovía ta por conocese, y, anque nun albidra que vaya contentar les sos demandes, alvierte de que'l retrasu ta llevando a confusión ente los interinos porque, a cuatro meses de que se convoquen les oposiciones, nun saben por qué sistema va facese.