10 años de rede

Nestos díis la rede de redes talo como la conocemos agora cumple los sos primeros diez años dende que'l Centru Européu pa la Investigación Nuclear (CERN) la punxo pa usu públicu'l 30 d´Abril de 1993

La idega entamó a garrar en 1989 dientro del ámbitu científicu que foi el que primero-y dio usu a la rede. En marzu de 1989 l'inxenieru Tim Bernes Lee plantegó un sistema de xestión descentralizáu de la información. L´oxetivu yera facer una rede de comunicación pa los físicos. Nesti proyeutu participaron dellos científicos de tol mundiu con enfotu de facer una rede de comunicación pa la comunidá científica. Nos últimos meses de 1990 la idega de Tim Bernes Lee fízose realidá y yá furrulaben los primeros servidores y navegadores de la WWW nel CERN de Xinebra. Nel 1991 la iniciativa espardiose per tola comunidá científica del mundu.

El gran saltu del WWW foi a partir de l´anuncia del CERN el 30 d´Abril de 1993 que ye cuando la rede pasa a los ordenadores personales faciendo navegadores más cenciellos d´usar. En payares d´esi añu la norteamericana "National Center for Supercomputing Applications" fizo'l primer navegador adaptáu al gran públicu, el programa MOSAIC, una antigúedá que tamién cumple los sos diez años.