1-0 y Ponzo de porteru

L'Uviéu yá sabe lo que ye ganar en 2ª B

Dos grandes intervenciones de Ponzo, un detalle de calidá de Michu y Yeray y el gol anuláu de forma xusta a Quini nel minutu 94, foron les claves que definieron los tres primeros puntos azules d'esti añu. Costó-y muncho al Uviéu ganar el partíu, y si bien se notó cierta meyoría respeuto a la pasada selmana, la victoria foi complicada enforma y l'afición pudo apreciar que l'equipu azul va necesitar un periodu d'adautación a la categoría. Otra vuelta quedó dafechamente claro'l rechazu de l'afición pa col conseyu, el Tartiere foi un gritu unánime escontra l'actual conseyu de direición.

El Zamora nunca nun-y perdió la cara'l partíu y foi claru dominador sobre too na primer metá. Salió l'Uviéu con un 5-3-2 que s'afogó nel centru'l campu y nunca nun vio salida peles bandes, con gran distancia ente llinies, el pelotu namái que lu sacaben en llargo los defenses y asina ye complicao poder xenerar ocasiones de gol. Na segunda parte, Rivas dio entrada nel campu a Yeray y Rubén, pasando a xugar con un 4-4-2 que-y dio otru aire muncho más ofensivu al equipu. Ponzo foi otra vuelta'l de siempres y con dos grandes paraes foi clave na victoria azul, el Zamora perdonó por dos veces y como pasa davezu, l'equipu que sí aprovechó la ocasión llevóse los tres puntos. Foi nel min 38 cuando una combinación ente Michu y Yeray nel borde l'área permitió al Canariu quedase solu ante Vilches y batilu perbaxo con un suave disparu, foi ún de los pocos detalles de calidá del partíu y que vieno a valir los tres puntos en xuegu. El Zamora abrió un poco les llinies, pero l'Uviéu foi a parar tolos ataques y salir con peligru en delles contres. Con cuatro minutos penriba de los 90, el balón llegó al área del Uviéu y Quini mandólu a la escuadra de Rafa Ponzo. L'árbitru señaló pal centru dando'l gol pero'l llinia sí vio la clara mano que fizo'l delanteru zamoranu enantes de marcar y anuló'l tantu, un bon sustu pa l'afición azul que poco dempués pudo respirar y disfrutar de los tres puntos consiguíos pero tamién plantegase ciertes duldes pal futuru del equipu nesta categoría.