“Ye evidente que la gran proteutora de Marta Renedo ye Ana Rosa Migoya”, afirma Benayas

El Bloque por Asturies apoya la decisión xudicial que va llevar a declarar como imputaos del 'Casu Marea' a Ana Rosa Migoya y a Carlos Madera. “Ye evidente que la gran proteutora de Marta Renedo ye Migoya”, afirma Manuel Benayas.

El voceru nacional del Bloque, formación personada como acusación popular nel casu, convocó esta mañana a la prensa pa tresmitir la opinión de la so organización sobre les decisiones últimes d’Ángel Sorando, xuez instructor del casu de presunta corrupción na Alministración pol que yá s’imputó a dos cargos altos del Gobiernu de Vicente Álvarez Areces, José Luis Iglesias Riopedre y María Jesús Otero. “El Bloque por Asturies apoya, como nun pue ser d’otra manera, la decisión que tomó’l xuez de citar a declarar en condición d’imputaos a Carlos Madera y Ana Rosa Migoya, ex direutor xeneral de Promoción Cultural y Política Llingüística, y ex conseyera, de manera respeutiva, en base a les declaraciones que fixo nel so día Marta Renedo” nes que responsabilizaba “a los sos superiores”, principió la so intervención Benayas. La ex funcionaria declaró énte’l maxistráu que-y ordenaron realizar una serie de contrataciones illegales a persones que, de manera supuesta, trabayaben pal Gobiernu pero que cobraben d’empreses ayenes a l’Alministración. Estes sociedaes, al mesmu tiempu, yeren resarcíes d’esi gastu al traviés de facturaciones ficticies.

“Nós yá pidiéramos con anterioridá la citación como imputada de la conseyera porque había firmes en documentos col so nome. Anque ye verdá qu’en dalgún casu demostróse que yeren falses, nun ye menos cierto que queden bastante más firmes por comprobar”, continuó Benayas. Darréu, el voceru nacional del Bloque apuntó que-yos paecen “llamatives tamién les declaraciones qu’efectuó recién Encarnación Rodríguez Cañas, tamién ex conseyera de Cultura. Nelles esplicó’l motivu que-y llevó, 17 díes depués d'entrar como conseyera, a cesar a Marta Renedo: tomó esa decisión porque yá la conocía de tener contautos cuando yera xerente de la OSPA, momentu nel que se quedó con una imaxe de Renedo de trabayadora poco seria y poco rigurosa”.

La formación nacionalista da por bones les razones espuestes por Rodríguez Cañas, esto ye, que la razón del cese nun fora “el conocimientu posible de dalgunes práutiques desendolcaes nesta conseyería mentes el mandatu de Migoya”, dalgo que considera que sería gravísimo, y céntrase “nel fechu evidente de qu’esa funcionaria poco seria y poco rigurosa vuelve a ser contratada a los cinco meses como xefa de serviciu n’otra conseyería, nesti casu la d’Alministraciones Públiques, xestionada de nuevo por Ana Rosa Migoya, que tamién fora vocera del Gobiernu”, recuerda Benayas, qu’afirma que “ye evidente que Migoya ye la gran proteutora de Renedo. Allá onde va, llévala”. El deséu del Bloque por Asturies agora “ye que se siga instruyendo’l casu” y ver qué ye lo que va apaeciendo. El representante llegal de la organización anunció que Migoya va declarar énte’l xuez el 8 de marzu, a les 10 hores, y Madera, media hora más tarde.

"Llamentables" declaraciones de la FSA

No que respeuta a les declaraciones de la FSA feches tres conocese la decisión del xuez, el voceru calificóles de “llamentables” y apuntó que “nun son lo que la ciudadanía demanda”. Na so opinión, el pueblu espera que’l PSOE “predique col exemplu; que lo que demanda pa casos de corrupción qu’afeuten a otros partíos tamién lo apliquen na so casa”, y que “en llugar de zarrar files alredor de los imputaos VIP, manifieste’l so respaldu más absolutu a l’aición de la xusticia facilitando al máximo la instrucción”. Tamién “qu’evidencie de forma manifiesta el so refugu a la corrupción algamada nos sos gobiernos y conseyeríes, xestionaes por persones del so partíu” y que “el so Gobiernu cese” de manera inmediata “a quienes exercen cargos de responsabibilidá pública y que tengan la condición d’imputaos” nesti o cualquier otru procedimientu, amás de suspendelos de militancia de manera cautelar.

“Eso sí ye tar contra la corrupción y lo otro, brindis al sol”, afirma Benayas, que tamién reclama “que s’abandone la política de nomamientos illegales n’Alministración y que se derogue la Llei de Función Pública, que ye vergoñosa, porque entendemos qu’estos dos elementos son el soporte sobre’l que sostién el control políticu sobre tol funcionariáu y que, nel tresfondu del asuntu, ye lo que permite que se dean actuaciones polítiques como ésta del ‘Casu Marea’”. Por último, dende’l Bloque recuerden al PSOE “que la ciudadanía ta farta de la corrupción; de que’l dineru públicu vaya, una vegada y otra, a manes de corruptos; y que, polo tanto, abandone esi discursu de la proteición de los sos intereses particulares y pase a defender los xenerales de la ciudadanía, que pasen pol esclarecimientu de los fechos, caiga quién caiga y sían quiénes sían les persones y partíos afeutaos”.

Entrugáu pola Comisión Parllamentaria qu’investiga la corrupción supuesta n’Alministración Asturiana, que va entamar coles comparecencies el 19 de febreru, Benayas calificóla de “paripé monumental” y dixo nun entender que “depués de trés años d’instrucción xucidial principia agora a funcionar una Comisión Parllamentaria onde yá sabemos que los imputaos, o los que se tienen que xugar dalgo, nun van dicir nin pío”. Amás criticó a UPyD, impulsora d’esta Comisión Parllamentaria, por nun utilizar la so capacidá política para personase “como acusación popular dende’l primer día, como fixo’l Bloque por Asturies”, y a la FSA y IX por “nun mover una paya en trés años”.