“La non convocatoria de places ye un pasu más na precariedá”, alvierte Bloque por Asturies-UNA

La coalición BA-UNA muéstrase contraria a la decisión d’Educación de nun convocar esti añu oposiciones pa Primaria y Secundaria. Pa los nacionalistes, la xubida d’interinos “nun ye un beneficiu pa ellos”, sinón precariedá.
 
Yolanda Huergo, vocera de la coalición y númberu dos de la candidatura pola circunscripción central, asegura que “la comunidá interina lo que ta demandando son unes oposiciones que seyan quien a estabilizar el so trabayu y con él la vida y llabor de los centros escolares”. Pal Bloque por Asturies-Unidá Nacionalista Asturiana l’aumentu del númberu d’interinos supón “un pasu más na precariedá del trabayu docente y l'aprobecimientu de la calidá de la educación”.
 
Los argumentos daos pola Conseyería d’Educación y Ciencia pa nun facer la convocatoria tampoco convencieron a BA-UNA. "Resulta paradigmáticu que'l conseyeru Herminio Sastre utilice como escusa'l mieu al ‘efectu llamada’ que produciría la convocatoria n'otres comunidaes", señala Huergo, que considera que "el Gobiernu asturianu tien na so mano la convocatoria d'una prueba de nivel de llingua asturiana que resultara un meru trámite pa los opositores asturianos, como se fai n'otres comunidaes con llingua propia". Nesi sen, la vocera de la coalición recalca que "esti Gobiernu y, en particular, esta conseyería, nun s'alcuerden de la llingua propia d'Asturies nin cuando pue representar una solución llaboral".
 
N’opinón de BA-UNA, ye un “contrasentíu’l recorte brutal que'l Gobiernu asturianu ta imponiendo sobre la dotación de los centros escolares, los sueldos del personal docente y les propies ufiertes d'emplegu públicu, demientres que se destapen los casos de corrupción qu'habríen de poner coloraos a aquellos que lleven años pidiéndo-yos a les escueles qu'aforren en cartulines o n’atención educativa a los alumnos con necesidaes educatives especiales".
 
Amás, de la coalición nacionalista, los sindicatos educativos tamién mostraron la so disconformidá cola decisión d’Educación. Comisiones Obreres define como “un error históricu” la non convocatoria d’oposiciones, mentes que’l CSIF considera qu’ésta va suponer un descensu na “calidá del serviciu” y na “estabilidá y remocicamientu de les plantiyes”. Pela so parte, ANPE señala que’l fechu de qu’Asturies y otres comunidaes nun faigan convocatoria vien dao porque “a los políticos resulta-yos más atractivo la precariedá de los trabayadores públicos, yá qu’éstos suelen ser más dóciles que los funcionarios de carrera, que trabayen con independencia” por tal condición.
 
Por último, Suatea lamenta qu’Educación “pretenda desviar l’atención con visiones d’alcance curtiu como ye l’afirmación de que nun convién” convocales pol 'efeutu llamada' que perxudicaría a los opositores asturianos. Pal sindicatu “lo más importante a destacar ye’l fechu de que son necesaries miles de places de primaria y secundaria nel conxuntu del Estáu y nun se convoquen porque l’oxetivu real d’esta midida ye la reducción del gastu públicu y esi ‘efeutu llamada’ la escusa chapucera con la que quedar bien faciendo lo que’l vecín”.