“Allegrámonos de que Riopedre tea en llibertá, pero namás”, señala Migoya

El Gobiernu asturianu ta contentu pola lliberación del so ex conseyeru d’Educación, José Luis Iglesias Riopedre, acusáu de corrupción supuesta n’Alministración. Asina lo certificó la so vocera, Ana Rosa Migoya, nunes declaraciones curties.
 
“Alegrámonos de que Riopedre tea en llibertá, pero namás”, afirmó Migoya a entrugues de la prensa tres la celebración del Conseyu de Gobiernu. Éstes son les primeres declaraciones del Gobiernu d’Asturies tres la lliberación esti llunes de Riopedre, presu dende’l 25 xineru por tar vinculáu na ‘Operación Marea’ de corrupción supuesta n’Alministración, tres el pagu d’una fianza de 100.000 euros. Los delitos que se-y imputen son los de prevaricación, sobornu, tráficu d’influencies, fraudes y cobros illegales, y negociaciones prohibíes pa funcionarios.
 
El ex conseyeru d’Educación del PSOE, suspendíu de manera temporal de militancia, ofreció ayeri una rueda de prensa na que reivindicó la so inocencia “respeuto a toles acusaciones de los delitos supuestos que me imputen ensin concreción dalguna de los fechos”. “De xuru qu’a lo llargo de la mio cometí errores abondo, pero en nengún casu utilicé’l mio puestu de responsabilidá pública pa beneficiu propiu”, afirmó. Otra manera, el PP de Xixón criticó güei que nengún miembru del Gobiernu del país asumiera responsabilidaes polítiques pola ‘Operación Marea’.